眾新聞 Logo
眾新聞 CitizenNews
眾說

你今日打咗未?


好似射12碼一樣有一半機會中同一半機會唔中嘅國產科興疫苗終於來到香港啦!周一(22日)仲有一班高官同埋立法會議員齊齊排隊接種添!大家見到血汗錢用咗嚟買呢隻60歲以上長者用完之後可能更大機會中招嘅疫苗,係咪好似盧寵茂一樣覺得咁興奮呢?不過,作為一個宣傳科興疫苗嘅活動,今次認真搞得好差。只要大家留心整個活動,就可以見到有幾多個地方失禮,公關公司或者負責嘅政府相關部門係有幾抵打。

首先,咁多位高官入面竟然有三個冇到。陳茂波話忙於處理財政預算案;黃錦星話要出席立法會環境事務委員會會議,雖然立法會議員好多都去咗打針;至於奶共華就話自己有其他公務 。行政會議成員入面,查史美倫一樣話配合唔到時間缺席。而家全世界恥笑緊科興生物連做臨床研究都渣過No Stake醫學生,95% 可信區間唔係闊過西隧,而係闊過成個維港。堂堂一間生產到疫苗嘅生物科技公司,竟然窮到請唔起專業團隊幫手寫研究報告同埋計數。其實如果想95%可信區間冇咁難睇,讀過少少統計學嘅人話你知有個方法叫bootstrap可以搞得掂。偏偏呢隻同陳笑恥一樣咁值得畀人恥笑嘅疫苗,嚟到香港竟然仲有三位高官同一位行政會議成員夠膽走咗去唔打。你話呢個宣傳方法夠唔夠爆?你話自己好忙咩?拍廣告扮阿茂整餅又唔見你唔得閒; 走去清算港台亦都唔見得要嘥奶共華幾多時間;至於立法會會議,班議員齊齊去咗打針,邊有人同你開會呢?上次 許冠傑演唱會,班官員個個坐定定喺度睇,仲要得閒到影埋相上網打卡。究竟疫苗緊要啲定許冠傑演唱會緊要啲?你話呢?

第二,個亮點就係大家嘅口罩。特區政府攞咗好幾億元生產咗一大堆銅芯抗疫口罩,結果戴住呢個銅芯抗疫口罩原來係入唔到醫院嘅。去到打疫苗呢個要齊齊影相嘅活動,竟然得林鄭月娥一個戴住銅芯抗疫口罩,其他全部戴外科口罩。銅芯抗疫口罩原來得返林鄭月娥自己一個支持,其他議員和官員身體很誠實,再一次證明生產銅芯抗疫口罩係浪費公帑嘅小白象工程。真係多謝曬 。

第三,個亮點就係負責打針嘅嗰一位醫護人員。幫林鄭月娥同其他官員議員打針嘅時候, 竟然冇帶手套, 徒手消毒手臂然後打針。其實喺疫情咁嚴重嘅時候, 就算師奶出街買餸都會帶手套。呢一位醫護人員竟然徒手打針,究竟佢知唔知道佢打針嘅環節係會被鏡頭拍低嘅呢?所謂做戲做全套,就算呢一針唔係疫苗而係鹽水,都唔該好好睇睇戴返對手套,話畀人知你係醫護人員 。

第四,成班官員同議員打完針之後排企影相,完全冇保持適當社交距離,究竟係咪違反咗限聚令,要每人罰5000蚊呢?幾個中學生擺街站要畀人拉,25個官員同議員打完針仲未有疫苗保護就分兩行排開影相,個個企得好近,甚至乎係肩貼肩,唔通呢班議員同官員曲線話畀大家聽社交距離措施係冇用,所以打完第一針未有任何保護,就可以排排企影相交叉感染?大家仲記唔記得疫苗顧問專家委員會當日影相係保持社交距離嘅呢?

一個用嚟宣傳科興疫苗既活動,竟然錯漏百出,求求其其都搵到四個亮點。究竟有幾多人睇完直播之後,仲會相信呢一隻疫苗呢?為咗幫科興生物散貨,已經有人不斷畀壓力疫苗顧問專家委員會,睇完嗰一份得啖笑嘅科興生物第三期臨床數據,就即刻安排航空公司拿拿淋送批疫苗到香港,好似驚如果批疫苗未能成功甩手就會變成蟹貨咁濟。好心你哋啦,公關都做得咁差,點樣𧥺到返香港人打針呀?


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe