眾新聞 Logo
眾新聞 CitizenNews
眾說

不懂愛國的局長


全國政協副主席、國務院港澳辦主任夏寶龍提出咗愛國者治港方針之後,政制及內地事務局局長曾國衛即刻宣佈《2021年公職(參選及任職)(雜項修訂)條例草案》,列出正負面清單, 定義效忠特區擁護基本法。曾國衛被問到是否意味需要愛國愛黨,曾國衛表示紅線是絕不能允許作出損害中國共產黨帶領的社會主義制度的行為,因此不可以聲稱愛國,但不愛或不尊重共產黨的領導。但係愛國係咪等於要愛共產黨?呢一條並唔係一百萬嘅問題,而係一條好簡單嘅愛國問題。如果真係愛國的話,點會連咁簡單嘅邏輯都唔認識呢?

政制及內地事務局局長曾國衛公布《2021年公職(參選及任職)(雜項修訂)條例草案》。香港電台影片截圖

曾國衛今日嘅所作所為,其實完全冇驚喜可言。就算消息指出熱血公民鄭松泰隨時可以留低,一樣都係預期之內。取消四個議員資格,佢哋想做咗好耐啦!問題係未搵到藉口啫!今日DQ 4個,聽日就會DQ 更多,因為不論係中共定係港共政權,一樣其實都係盧永雄口中嘅政治巨嬰,永遠都係公就我贏,字就你輸。一句到尾,唔輸得。邊個贏咗佢就發脾四,好似細路仔玩泥沙一樣,話呢一舖唔算數,要重新嚟過,直到佢哋自己人贏曬為止嘅政治巨嬰行為囉!所以今屆區議會其他民主派議員隨時因為政權唔輸得,一個又一個被取消資格,未來嘅各級選舉一定會被改到自己人贏曬為止。明明建制派做咗咁多年都得不到民心係建制派嘅錯,偏偏政權唔係咁諗,係都要好似細路仔玩泥沙一樣,一日到黑搬龍門,搬到自己滿意為止。以後不如索性取消選舉好過啦,冇選舉就冇輸贏,打和super!

至於曾國衛嘅言論完美示範國民教育嘅重要性。政府官員一日到黑都話要加強國民教育,因為國民教育不足令到年輕人唔愛國喎。但係講到自己好愛國,自己嘅中國歷史水平真係得啖笑。而家就等比起曾國衞更加愛國嘅筆者教返曾國衞中國近代史啦!

中華人民共和國現時實行中國共產黨領導的多黨合作和政治協商制度,雖然人人都知實際上係一黨專政,但係根據相關政治協商制度,除咗執政黨中國共產黨外,中國有八個民主黨派在接受共產黨領導下具有參政黨的地位。亦即係講,中國理論上有九個有資格參政嘅政黨,所以愛國唔代表一定要愛共產黨,你仲有八個民主黨派可以揀㗎!呢八個民主黨派包括中國國民黨革命委員會、中國民主同盟、中國民主建國會、中國民主促進會、中國農工民主黨、中國致公黨、九三學社同埋台灣 民主自治同盟。呢啲政黨喺全國人大擁有11至64個席位,至於全國人大常委席位就由兩個至八個不等。一句到尾,愛國不等於愛黨,因為理論上中國仲有八個參政黨。就算實際上佢哋係共產黨B隊或者係傀儡政黨,但係理論上你有得揀呢一班政治花瓶。因為就算喺毛澤東年代都知道一黨專政唔可以做得太明顯,所以都要搵一班嘍囉出嚟扮下民主政黨,搞下政治協商制度。所以如果今時今日有人話愛國等同愛黨,就足以顯得出相關人士對於偉大祖國嘅認識有幾膚淺。

個個都講愛國,唔通個個都知乜嘢叫做愛國咩!係咪一定要等同愛黨,喺毛澤東年代已經否定咗。只可惜香港充斥著一大班低質愛國者,連中國歷史,尤其係同共產黨關係密切嘅近代史都未讀好就喺度發噏瘋,真係失禮死人。曾國衞話畀你聽乜嘢叫做又唔做嘢又唔讀書,好心你啦成日叫人愛國,自己連中國共產黨歷史都未讀得熟就亂咁吹水,真係笑大人個口呀!


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe