眾新聞 Logo
眾新聞 CitizenNews
眾聞

【初選大搜捕】有心人派物資 旁聽市民:感到同路人仍在 彷如回到19年的香港


47名參選或組織民主派初選人士,被控「串謀顛覆國家政權罪」,昨日於西九龍裁判法院提堂超過13小時,審訊至凌晨二時,有被告不適要送院。總裁判官蘇惠德決定休庭,今日早上11時半續審,期間各被告須交由懲教看管。

今早來排籌旁聽的市民明顯比昨日減少,仍有人身穿黑衣,在排隊期間互相噓寒問暖,有市民擔心清晨已到場排隊的市民會體力透支,特意購買糧食及飲品供人自由取用,這畫面讓他們感到如同回到2019年的香港...

「直程好似去返雨傘、612嗰時咁」

身穿運動外套、緊身褲的黃小姐,黑色鴨舌帽下藏著挑染的金髮,瘦削的手臂上掛了大包小包,走到椅子上放下數袋火腿芝士三文治、麵包、蒸餾水和能量飲品,輕拍正在排隊市民的肩膀,請他們幫她傳給其他人。

黃小姐擔心一些清晨已到場排隊旁聽的市民會體力透支,故特意購買糧食及飲品,供人自由取用。黎卓欣攝

眼皮塗上閃粉眼影的黃小姐從事金融業,今日仍是在家工作,「我都係Lunchtime偷偷哋溜出嚟!」

她憶述昨日排隊時,很多人不敢離開去廁所,也不敢買食物充饑,「佢隨時放你入去,邊夠膽走,個個都係餓住攰住。」直至看到一位16歲的青年自掏荷包買了一箱蒸餾水到場,因而深受感動:「直程係好似去返雨傘、612嗰時咁。」

黃小姐擔心一些清晨已到場排隊旁聽的市民會體力透支,故在附近黃店買了一些糧食及飲品,她手叉一叉腰:「如果我拎到,我都想拎多幾梳蕉!依家睇吓入面會唔會放飯,有需要我再call車送嘢嚟。」

靚太:等到全世界都知道香港人係未忘記呢單嘢

48歲的黃太是全職家庭主婦,一身全黑裝束,加上啡黑色的太陽眼鏡,說起昨日排籌略有疲意:「尋晚8、9點先走,求其食啲嘢,都返唔到去煮飯畀個仔,叫佢自己搞掂,阿媽要出去做正經嘢。唉,不過今日學精,煲落湯、做完家務先嚟。」

黃太說,這兩天來支持是希望「全世界都知道香港人係未忘記呢單嘢」。黎卓欣攝

她說不擔心會被警察拍下樣貌,但就不太想兒子來聲援。對於社會事件,她有自己的主見:「始終警察都係針對年青人,我個仔都準備去美國升大學,希望唔會有咩差池。我都就快五張,怕咩啫!」

三句說話有兩句離不開正準備應考文憑試的兒子,目暏土生土長的地方已今非昔比,她自言不捨得離開,但最揪心的是兒子的前途:「因為我真係好鍾意香港!但個仔就真係要走架喇,有能力就送咗佢走先,我都叫佢以後唔好返嚟喇!真係都無咩希望,除非變革咗,如果唔係返嚟都無用!」

昨日前來旁聽的人眾多,黃太未能成功排到籌號,但仍留在法院門外,未有離開或旁聽其他案件。黃太解釋,昨日有不少外媒在場,希望能「做個勢」:「尋日有好多外國記者、好多唔同嘅報道,要逼爆呢度,等到全世界都知道香港人係未忘記呢單嘢,會繼續聲援!」

「身心都一定好攰,但家屬都好努力捱落去」

戴著黑帽、虎紋眼鏡的彭小姐,代表民協為何啟明及施德來的家屬排隊。她說,昨日馬拉松式審訊至凌晨,家屬亦已十分疲累,「身心都一定好攰,但佢哋都好努力捱落去。我問有乜可以幫手,佢哋就話可唔可以早少少幫手排隊,想瞓耐小小先嚟。」她又指,凌晨宣布休庭後,被告隨即交由懲教看管,倉促之間家屬仍未掌握到完整資訊:「好多嘢都未知會到住,例如可唔可以送私飯或者其他support。」

黎先生:這兩天見大量同路人感温暖

25歲的黎先生這兩天都在早上8時許抵達法庭排籌,不過昨日人龍太長,最終未能入內旁聽:「比依家當然多好多人啦,8點幾嚟到已經排到去後邊,今日明顯少好多人。」

他坦言自己平日較少旁聽案件,但認為這宗案件正反映政府如何利用手段,打壓參與政治的人士,故希望親身到場支持各被告。

黎先生說,這兩天見大量同路人感温暖。黎卓欣攝

昨晚回家後,黎先生仍有關注法庭的最新報道,對提堂近14小時感驚訝:「只係講保唔保釋,已經要破天荒馬拉松式審訊。去到10點,就諗會唔會攪到12點,點知最後拖到2點,唔到楊雪盈暈低佢都唔停。」

他說,這兩日看到有大量「同路人」到場支持,感到溫暖:「就算排唔到隊,大家都一齊喺下邊(法院外),見到咁個心好寬慰。」對於昨日警方警告現場人士正涉嫌參與非法集結,他批評難以理解:「雪糕筒就你(警方)擺嘅,線又你拉嘅,隊又係你安排大家排嘅,咁無理由我哋企喺到等候聽審,都會構成集會遊行。」




請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe