眾新聞 Logo
眾新聞 CitizenNews
眾說

太陽能電筒


傳說中嘅立法會和特首選舉改革終於有眉目啦。中央打算增加選舉委員會人數到一千五百人,踢走全部區議會代表,而且立法會議席亦都增加到90席。大家係咪覺得好民主呢?唔好傻啦,呢個改革就好似太陽能電筒,一樣有L用咩。既然你咁唔想香港有民主,不如索性宣佈取消所有選舉就好,等香港政府出現財政赤字嘅時候可以節省開支費,取消選舉事務處呢個多餘嘅政府部門。

當日為咗收番香港,當年嘅中共開了一張又一張空頭支票,表示會達到雙普選。點知每次香港人問幾時有普選,中共就好似債仔一樣,0708年雙普選(1990年代香港三大政黨成立時,民主黨、自由黨和民建聯均支持2007、2008年雙普選;2004年民建聯蔡素玉表示民建聯支持07/08雙普選。),變咗2012雙普選(民建聯於2005年5月提出,在2005年獲得大部份立法會議員支持;三部曲變做五部曲然後又攞一個假普選方案hea住你,你唔要就索性連利息都唔還畀你,龍門當然係任佢擺。當日民主黨可以入中聯辦密室談判,而家民主黨前立法會議員都畀人拉曬,黃碧雲都竟然被控告顛覆國家政權罪,你話死未?其實你唔想畀香港人有民主你咪出聲囉,其實大家都預咗你會點做啦,塊面都已經搲爛咗,無謂再做冇多餘嘅小動作。就算選舉委員會有十萬人都冇用,反正呢十萬人都冇民意授權,一句到尾「球證、旁證、足協、足總、足委,全部都係我嘅人,你點同我打呀?」。你以為十萬個自己人選一個特首就好有認受性咩?咁樣北韓應該比美國有更多民主啦。同樣地,立法會多20件忠誠的廢物只等同浪費更多公帑養垃圾,你搵馮檢基、湯家驊、狄志遠出嚟做忠誠反對派,你估仲有冇人會含淚投票?我寧願留番時間瞓多陣好過同你排隊投票給一班忠誠的垃圾。

其實發明太陽能電筒選舉制度嘅人,不如你慳番啖氣,做一啲對人類有裨益嘅事好過啦。就算你搞一個三不像嘅選舉制度出嚟同我講唔投票係我損失,我都唔會同你含淚投馮檢基;紫荊黨定民建聯係執政黨關我乜事,反正你都決定咗選舉結果,做乜要浪費我時間去投票啫?


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe