眾新聞 Logo
眾新聞 CitizenNews
眾聞

【亂世情侶】 劉頴匡女友Emilia :堅持每日扮靚到收押所 相見15分鐘是彼此強心針 


47人因組織或參與民主派初選,被控串謀顛覆國家政權,大部份被告均不獲准保釋。在荔枝角收押所外的閘口,每一天車水馬龍,人來人往,來往收押所的人臉上總是眉頭深鎖、悶悶不樂。然而,當中總不乏一個花枝招展、笑面迎人的女子身影,穿梭於前往石牆的道路上,探訪後亦不抗拒接受傳媒訪問,向公眾透露探望獄中人的點滴,這名八面玲瓏的女子就是劉頴匡女友,黃于喬(Emilia)。

每一次見佢都希望個人係精精神神咁,試問邊個會想見到自己鍾意嘅人落晒形呢?

Emilia每天早上都會悉心打扮,務求劉頴匡見到自己最好的一面。   曾港深攝

今年26歲的Emilia,畢業於香港中文大學法律系,與劉頴匡是大學同學,也是辯論隊隊友,2014年開始拍拖,至今已攜手踏入第七個年頭。兩小口本來面臨最大的危機應是「七年之癢」,卻被港共政權帶來的國安法捷足先登,分隔這對亂世情侶。

由同居到獨居的日子

由2月28日被要求到警署「提前報到」,隨即被落案起訴及即時還柙,再經歷連續四日的馬拉松式審訊,至今已經28天,而一直與劉頴匡同居的Emilia,生活上也起了變化,「真係靜咗好多囉,哈哈!佢平時陪住我嗰陣,個世界會得意啲嘅,因為佢好鍾意講啲搞笑嘢、又會無啦啦係到同我好似上lecture咁,講埋啲量子力學、講呢樣講嗰樣,當然佢唔係樣樣嘢都識啦,只不過係聽完人哋講,又跟住係到噏咁,但都有趣過現在。所以生活就靜咗好多囉,雖然宜家都好多嘢做,又要幫佢打點呢樣嗰樣,例如要幫佢係Facebook出吓post等等,所以都無咩時間俾自己真係好唔開心,都要開始學識慢慢接受。」

不過,Emilia坦言她亦有大大小小的事要打理,包括照顧家人和寵物,雖然這段時間不斷處理劉頴匡的事情,但實際上她都有自己的生活要過,所以她明白到生活上確實出現變化,但仍然要繼續過活。

「雖然我係好關心佢,好在乎佢,但係又唔會話無咗佢,個世界就會冧嘅,可能佢唔會咁認為啦,因為佢成日講話『無咗我,佢坐廿年都無所謂,因為都無意義』,我當然唔同意啦!因為事實上,呢個世界無任何人係無咗邊個,而個世界就會冧,就會無意義,所以我哋每個人都要盡自己嘅能力,去過自己嘅生活囉。」 

Emilia每星期都會領取「石牆花」準備的零食包,為收押所內的劉頴匡進行補給。   張凱傑攝

或許是沒有劉頴匡在旁,就算天天四出奔波,風雨不改地來往屯門至荔枝角,理應疲倦不堪,但Emilia睡眠質素仍然麻麻,她每天早上六點左右就會自然醒,和以往的生活方式亦截然不同,「以前多數瞓到黃朝百晏,因為日夜顛倒晒,但自從佢提前報到之後,我就瞓唔到耐,頂盡瞓幾粒鐘就會醒。」

想見對方精精神神的樣貌

Emilia又提到,通常早上時間充裕,她都會在家中「扮吓靚」才去會見劉頴匡,因為她知道劉喜歡見到她精精神神的樣貌。她笑說

劉頴匡都成日話見我之前會整一整個頭,當然其實無咩分別啦,因為佢係入面都無嘢整,佢嘅意思就係用啲水『臘一臘』個頭,其實佢都只係想精精神神見我,因為如果見到大家都殘晒、好頹、唔開心咁,其實大家心情都唔會好過。所以大家都想係嗰15分鐘展現返最好嘅一面俾對方睇到,令對方安心。

香港每一天都上映着不同的荒誕劇目,Emilia認為保持心境開朗、珍惜當下的心情,已經是最好的應對方法,「而家呢個政府咩都做得出,無得預計,亦都無特別去倒數仲可以見佢幾多日,因為都估唔到個政府想點玩,所以只可以見步行步,而家有得探咪探囉,而家有得入私飯咪入囉。」,不過她亦坦言,當第一天看到劉頴匡的囚衣上繡上其名字時,難免會有點難過。 

Emilia每日都會寄信入荔枝角收押所,紀錄日常生活大、小事,又會夾離一些有趣新聞、親政府的言論,為石牆內的劉頴匡解悶。   張凱傑攝
 

Emilia形容每一天探訪劉頴匡的15分鐘是彼此一支「強心針」,「雖然長途跋涉,用咗成半日時間先見到佢15分鐘,但對於佢、對於我都係一個好重要嘅時刻。至少見到大家都安好,佢又睇吓我點、我又睇吓佢點,我覺得係而家呢一段咁艱難嘅日子入面,係一個好特別嘅moment」。

每天寫點滴 只希望大家仲記得佢

由於劉頴匡現時只是還押候審,還未定罪,所以親友可以每天都去探他15分鐘,假若日後劉頴匡被定罪,便一個月只能夠探訪兩次,所以Emilia特別珍惜這段「日日都可以見面」的還押時間。在旁人眼中她日日去探訪劉頴匡是很堅持,Emilia卻不以為然,只回道「想見咪去見囉,再唔見遲啲就無得見。」

她又提到,當中的15分鐘,不是全部都可以用來與劉頴匡傾訴,因為她多數都會帶同關心劉的人一起去探訪,「所以大部分情況都係佢會好奇其他人生活過成點,佢唔想好似同出面嘅人完全斷絕晒咁。當然佢係入面都成日睇報紙,不過知道新聞係一回事,知道朋友嘅update又係另一回事。」

Emilia 每天也很勤力在社交媒體出post,或接受傳媒訪問,透露跟劉頴匡會面後的趣事或他的近況,她寫的post笑中有淚又充滿黑色幽默,如近日出post講屯門警署竟來電叫劉頴匡去報到,Emilia便幽阿sir一默說 #唔好意思顛覆咗個政權無得報到。努力出post,Emilia解釋只希望大家唔好忘記牆內的他。

只係希望大家都仲記得佢係受緊苦難囉!因為如果無人講、無人提嘅話呢,真係會唔記得咗,如果啲人真係忘記咗佢,佢就好唔抵囉。

女友眼中很有理想很浪漫的人

她亦補充「好唔抵」當然並不單單是劉頴匡,亦包括其餘正在還柙的35人,只是她並不能代表他們全部表態,「可能會有人想靜靜地,唔想出面啲人記住,完全理解佢哋嘅心態。但劉頴匡就一定唔係,佢唔會想出面啲人咁快忘記咗佢,當然佢知道呢啲嘢無得勉強,假如佢要囚十年,唔通要人哋日日都仲咁care佢咩,其實無可能㗎嘛,香港人又咁善忘,熱情總會有一日冷卻㗎,唔記得咗佢哋,生活如常咁,其實佢已經係預計咗呢一樣嘢。」Emilia轉述劉頴匡現時在獄中最想向香港人講的一句說話就是:

希望大家記得唔好放棄呢一個地方!
Emilia及劉頴匡拍拖7年,一直低調,雙方都極少上傳與對方的合照。   圖為2月28日劉被要求到警署「提前報到」後,Emilia上傳至instagram的合照
 

經歷七年的愛情長跑,多年來一直投身政治及社會運動的男友,在Emilia眼中是一個如何的人?她思索一會後,回道:「非常有理想,充滿浪漫主義嘅一個人。有好多偉大嘅想法、目標想達成嘅一個人,平時成日講埋啲嘢天馬行空,又成日都會幻想點樣參與到政治,點樣守護住呢個美麗嘅香港。但其實佢唔suppose係一個浪漫嘅人,因為係一個正常嘅社會,你咪做你要做嘅嘢囉,但現在呢個香港就係咁,參政已經變成一種好浪漫嘅嘢。」 




請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe