眾新聞 Logo
眾新聞 CitizenNews
眾聞

【疫苗氣泡】餐廳老闆批將社交距離措施與疫苗掛勾:依家打疫苗唔係防疫 係為咗食飯 !


特首林鄭月娥昨日公佈最新抗疫路向,措施分三階段實行,第一階段包括要求食肆員工全數接種第一劑疫苗、客人必須使用「安心出行」登記行蹤,以換取延長營業時間至午夜12時,每枱人數上限由4人提升至6人,期望能於本月29日後實施。

有火鍋店老闆指不想員工冒險接種疫苗,寧少做兩小時生意,又指不解為何接種疫苗要與食肆掛勾:「打疫苗唔係防疫,而家係打疫苗係為咗食飯 !」

對於政府要求在第二階段,員工接種第二劑疫苗及顧客接種第一劑疫苗後,食肆可劃出特定範圍,每枱人數可提升至8人。火鍋店老闆黃先生則認為難以實行:「我哋唔係大集團,冇過萬呎嘅地方,我哋幾百呎地方,點劃一個Clean Zone俾你呢?如果呢枱係Dirty Zone,隔條走廊係Clean Zone,咁到頭來Dirty Zone同埋Clean Zone咪又係同一個環境入面?」

位於旺角白布街的火鍋店陸陸雞煲,老闆黃先生昨日在餐廳專頁表示,「覺得依家收十點,各位同事早收工返屋企比以前更健康更安心」。餐廳本主力做晚市,由於十時便要結束營業,而客人多數下班後7時才入座,因此現時每晚通常只能做一輪生意。黃先生估計少了兩小時營業時間,無法翻桌,損失接近六位數字營業額,即使有做外賣及加開午市,仍然「補唔番」:「依家外賣單比之前少咗8成,得禮拜六日有機會有人買,因為依家有機會可以出街食飯,平日基本上冇乜人問。」至於午市,他說由於附近沒有商廈,也沒有其他餐廳做午市,人流極少,「得幾枱客」。

陸陸雞煲老闆黃先生昨日在餐廳專頁表示「覺得依家收十點,各位同事早收工返屋企比以前更健康更安心」。網上截圖

黃先生批評政府的政策針對食肆欠邏輯,「依家打疫苗同食飯係掛勾左,即係打疫苗唔係防疫,依家係打疫苗係為咗食飯。」他指,接種疫苗是個人意願,不能強迫員工接種,「健康性命緊要,我寧願做少兩、三個鐘生意,好過要班同事冒險。」

他坦言只營業至晚上10時,對生意一定有影響,但同樣從生意角度做評估,認為即使開放至12時,帶來的收入亦未必理想,故衡量過員工利益後,決定不延長開放時間:「全香港嘅人已經俾政府搞到生活習慣改變咗,個個早睡早起, 10點之後條街係冇人,好似宵禁咁。就算依家我走出嚟,所謂『妥協』嘞,做到12點嘞,但我認為對營業額唔係話有太大幫助:基本上而家條街都靜鷹鷹,加上又唔係全香港嘅食肆都會開到12點,淨係得你一間開到12點,有咩作用?」

「疫苗氣泡」第二階段,當所有員工已接種兩劑疫苗,14天後產生抗體,以及所有顧客已完成第一劑疫苗並使用安心出行,食肆可劃出特定範圍(Clean Zone),每枱上限8人;若只接待已接種兩劑疫苗的顧客,每枱則可增至上限12人,宴會人數可進一步提升至100人,堂食時間延長至凌晨2時。對此安排,黃先生直言是離地、荒謬:

「我哋唔係大集團,冇過萬呎嘅地方,我哋幾百呎地方,點劃一個Clean Zone俾你呢?如果呢枱係Dirty Zone,隔條走廊係Clean Zone,咁到頭來Dirty Zone同埋Clean Zone,咪又係同一個環境入面?」

另一位於元朗的餐廳「亞萊泰菜」,老闆Oscar指現時晚上9時便要截單,每晚至少損失3000元營業額。不過,他說雖然現時盈利不多,但能維持營運,不希望為了多賺一輪生意,強迫員工接種疫苗:「老實講人哋打份工啫,打針嘅死亡數字大家都睇到,全世界都一樣,總之有香港依家可接種疫苗牌子嘅國家,接種嘅死亡率都係好高。我會唔會開多幾個鐘舖,但代價係失去咗幾個員工?」

「亞萊泰菜」老闆Oscar指雖然餐廳營業至10時盈利不多,但能維持營運,不希望為了多賺一輪生意,強迫員工接種疫苗。黎卓欣攝

對於「疫苗氣泡」第二階段以顧客是否接種疫苗作提升每枱人數上限的條件,Oscar說,政府的防疫措施常把食肆經營者「夾喺中間」,而實際上對餐廳亦不公平:「你點知啲食客有冇打?佢話有打嘅,我信咗佢,我又冇理由查佢,但萬一有食環、差佬嚟Check,你要告要拉係拉埋我喎,成件事係唔fair。」

他笑說,自己的舖面只有約200呎,沒有空間「間房」,要劃分Clean Zone的話,只能請已接種疫苗的客人到洗手間開枱。「啲大酒樓可能做到,但好似我哋呢啲,或者再細啲賣小食,得一兩張枱嘅舖仔,點劃兩個區出嚟?」他批評高官的政策未有從餐廳角度出發:「呢班人根本只係諗點樣將自己屋企劃幾個區!」

位於元朗的餐廳「亞萊泰菜」。黎卓欣攝

 




請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe