眾新聞 - 麥難民

【撰文：鄧永謙】
作者簡介：新福事工協會關懷貧窮學校事工主任

有次，我哋帶咗幾個年青人喺麥記過咗一晚，體會同睇見麥難民嘅身處環境同狀況。去咗一間平時都比較旺嘅24小時舖，凌晨兩點仍然係熙來攘往，顧客絡繹不絕，基本上喺所有24小時運作嘅麥記，都會有喺呢到瞓嘅無家者，但呢一間，我真係想問，究竟可以點樣先至瞓倒？

左面係對情侶嘅依泣聲，細聲講，大聲笑，好似一個每兩分鐘會響一次嘅鬧鐘，右面係播放緊最新韓劇嘅師奶，前面係有班勁講粗口嘅Online Game團隊，而後面，就有不停因為郁動身子而令到靠背不停震動嘅食客…喺四方八面嘅吵吵鬧鬧中，見到有個「僕」咗喺枱到嘅身影，佢仿佛好似唔屬於喺呢個吵吵鬧鬧嘅空間，喺佢好似瞓著嘅姿勢嚟睇，佢嘅狀態係寂靜嘅，但唔代表佢聽唔倒聲音，因為如果係人都應該會聽到咁嘈嘅聲音，除非佢唔係人…呢位街坊如何煉成靜音嘅空間呢，而且仲可以瞓得咁搨？佢真係瞓得著？俾我就瞓唔著，點瞓？你今日瞓得著，仲有聽晚、後晚、一個月、半年…咁樣冇可能瞓倒，會死人㗎！如我所言，因為有人搭咗佢枱，街坊又要搬過另外一張枱瞓，我諗呢啲情況，一晚出現幾十次，佢邊到係瞓，係「䀫緊」，每一晚都係喺到䀫緊…

又有一位街坊喺啲梳化邊瞓，瞓到成個人打側晒出走廊，瞓得好「冧」，但最搞笑係啲人喺佢身邊行過唔理佢，掂行掂過，睇嚟佢真係好攰，攰到一個點話知你，撞倒你咪撞倒你，至少我有一兩分鐘深沉睡眠嘅時間，賺咗！有人醒目搵倒啲唔食人間煙火嘅筍位，可以閉目養神，好似嗰個係佢嘅私家位一樣，原來麥記都有長駐同炒散，大家各自搵食，互不干涉，共存於同一空間內，渴求一陣子熟睡嘅時光…

點解佢冇地方瞓？因為租貴？因為個人問題？因為一個對社會無聲嘅抗議？無家者有冇人關注呢？大把啦，橋底又有，清場又有，麥記麥難民都有，咁佢地嘅情況有冇改善到呢？冇… 成日喺到諗，既然政府咁唔想佢地瞓街，咁咪立法囉，立法瞓街係犯法囉，但佢又冇立呀，冇立咁瞓街就冇問題啦，但係佢哋又要喺佢哋瞓嘅地方瀋啲癢粉呀，又用水喉Fer濕塊地等佢哋冇得瞓，總之就係話俾你知唔想見倒你哋班瞓街嘅，好啦，唔瞓公園啦，瞓喺條街到都得啦卦，又唔係喎，又叫食環嚟清佢哋場，話佢哋啲家檔阻街？其實好簡單，佢哋根本唔當無家者係人，只有當佢哋係唔存在又或者係要處理嘅死物，就可以好簡單用「清除」或者「移走」去解決呢個問題就可以。

政府根本唔當佢哋係人，同拾荒者一樣，唔當執紙皮係一份工作，所以佢哋執嘅紙皮係阻街，佢哋嘅人身安全可以唔駛關注，令到好多拾荒長者成為交通意外中嘅亡魂。同樣地，無家者嘅處境，無論係喺室內嘅麥難民定街上嘅風旅露宿，一樣只定為阻掟同影響市容，若果掌權者願意視佢哋為擁有尊貴生命嘅一群，我相信街友可以有棲身之所，建立佢哋自信等佢哋可以搵番嘢做，若掌權者唔係下意識地無論喺行政處理以及施政方面教育市民進一步將佢哋污名化，我相信唔會出現父母教細路：「你唔俾心機啲讀書就聽瞓街乞食啦，知唔知？」