眾新聞 Logo
眾新聞 CitizenNews
眾說

打完新冠疫苗後有不良副作用,個人保險保唔保㗎?


【撰文:保險代理公司主席保險仔】

剛接種過疫苗,依照姑娘指示,到休息區接受注射後觀察。期間,腦海中盤旋着一件事情:「去錯地方打錯針!」 

按保險仔親身經歷,由收到接種疫苗預約的確認通知,其後又在接種疫苗前一天送來提示,到實際接種,可謂重重把關。單是核對身分,以及接種前,姑娘詳細查問個人資料、打那種疫苗、病歷、身體狀況等等,都有條不紊,實在不應有出錯機會。保險仔對早排發生的幾宗去錯地方打錯針的情況,真係百思不得其解! 

當我行到去等候區,正打算搵個位坐吓,咦!呢個咪係我老死「險中求」,等我去打個招呼先。「喂!啊求!你都嚟打針呀?」佢竟無反應!唯有推了他幾下。「走得嗱?」險中求半睡半醒。「走你個頭!仲以為你打完支針瓜咗𠻹!」我揶揄道。「乜係你呀,保險仔!」險中求話。我哋吹咗陣水,講起最近新聞提到打完疫苗之後有可能死亡或出現嚴重副作用,啊求就問:「打完針後,如果因此而釘咗,又或者變重症,你地保險有冇得賠㗎?」 

疫苗注射後若死亡或出現嚴重副作用,保險如何理賠?

嘩!呢個險中求呀,啱啱先打完針,咁快就識得問咁貼身利益嘅問題,唔怪之佢咁富貴啦。果然係富貴險中求! 

賠償與否視乎購買產品和合約

「講呢啲!你估我開賭場咩,賠唔賠?」我揶揄道。「認真㗎!𠵱家周不時有報導話,打完疫苗後,有啲瓜咗,又有啲要入院,什麼血栓塞、中風、面癱……乜都有。至怕係半死不活,啲醫藥費都好襟計喎!」險中求嘅疑慮都好合理,咁我作為保險仔都好應該專業地釐清佢嘅疑慮。 

不知不覺,原來觀察時間已到,工作人員通知我哋可自行離開。反正險中求和我都放半晝唔使返公司,又未食晏,見肚餓,去整返碗米線加凍檸茶先! 

接種任何疫苗,不能視為意外事故。

「你先前問有冇得賠?咁,你買咗啲乜嘢保險先?」我問道。

「有個人意外險、醫療保險,人壽保險,家傭保險,仲有全年旅遊保險。」險中求其實一啲都唔犯險,仲好穩陣𠻹!有關個人保險類別的,都買得幾齊全。

「醒喎!你應該改名叫「穩中求」而唔係「險中求」!既然你咁穩陣,個人保險都買得咁齊全。咁,我就逐一講解一下。 

1. 個人意外保險:這個保險範圍,是障身體因意外遭受外在力量肇因,導致死亡、殘廢*、受傷*。若因接種疫苗而導致死亡、殘廢或受傷,一概不在受保之列。接種任何疫苗,都潛在已知的各種不同程度的險和副作用,故不能視為意外事故。(*理賠準則,因應不同保單條款而定。) 

2. 醫療保險:早前,自願醫保計劃辦事處表示,自願醫保可涵蓋因接種新冠疫苗而導致不良反應所衍生的醫療費用,包括住院和日間手術等等。至於其他醫保或住院現金保障,原則上都會理賠,但也不能夠一概而論。因為,不同保險公司的保險條款有別,甚至有些保單明文,不受保:「預防性質疫苗」衍生後續的醫療費用。 

3. 人壽保險:一般壽險,都會對任何原因導致的死亡作出賠償,因接種疫苗導致的死亡也不例外。 

4. 家傭保險:家傭在接種疫苗後,導致不良反應而產生善後的醫療開支,要視乎不同保單否列為保障範圍而定,不能一概而論。但若家傭因此而去世,其遺體遣送原居地及補聘新家傭的費用,應獲得賠償。 

5. 旅遊保險:接種疫苗後,導致身體不適,不能夠成行出發,有關的機票、洒店等費用,一概不會獲得賠償。除非是投保人因身故,身患重疾,身受重傷,又或遇上黑色旅遊警示或目的地發生自然災難等原因,而不能夠成行,這些情況,將可獲得賠償。 

了解保障範圍 保障消費者權益

「上面所講,只就一般情況而言。最好檢視一下各保單有冇涵蓋接種新冠疫苗嘅描述、索償有冇時間限制等。遇有不明或任何疑問,都應該向有關嘅保險中介人或所屬嘅保險公司查詢。多啲了解保障範圍,有益無損,呢啲都係消費者權益,亦係銷售者嘅責任。」講到呢度,飲番啖凍檸茶先。 

「見你保險仔講解得咁詳盡,算喇!呢餐我嘅!」險中求狀甚滿意!

「多謝晒喎!」雙方言笑晏晏,繼續吹水。 

作者簡介:保險仔,從事一般保險中介服務達四十年,期間,經歷保險市場及政府對行業的行為規管,隨時日不斷改進,日益成熟。目前,現職保險代理公司主席。


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe