眾新聞 Logo
眾新聞 CitizenNews
眾說

一齊出聲努力抵抗移民潮 係每個人嘅當務之急


編按:47名涉及參與或組織民主派初選的人士被控「串謀顛覆國家政權」,當中包括已解散的民間集會團隊發言人劉頴匡。劉從獄中來信,寄語港人不應因為恐懼而離去。眾新聞特此轉載劉頴匡獄中信的全文。

每個受苦難嘅人都總會希望自己嘅苦難至少可以有一啲意義。

假若47人坐監當真可令香港實現民主,我諗要我哋坐得再耐幾年都心甘情願,或者至少於我而言係咁樣。曾經天真地想過,如果政府夠膽拉晒民主派坐監,件事一定好轟動。而家政府真係敢做,亦的確曾經轟動過一時,但個世界都係冇任何改變。我哋經歷嘅苦難冇為民主運動乃至香港社會帶黎任何影響,就只係多咗相對出名啲嘅人坐咗監,想像中嘅政治衝擊完全冇出現,大概連當權者都會對呢一種詭異嘅平靜感到驚訝。

每日仍然不斷有新嘅手足踉蹌入獄,但都只係變成一個數字,而呢個數字嘅增加,只係令越來越多香港人驚、放棄、離開。幫政權手製造阻嚇力、減低民主運動嘅力量已經成為手足坐監嘅唯一意義。呢樣係咪就係香港人想見到嘅場面?又係咪喺牆內嘅人想面對嘅現實?

意義係有人去賦予嘅,我希望自己受嘅苦難可以成為香港人勇敢地堅持留低嘅理由,係可以振奮人心、而非擊潰士氣。當我明知將要承受刑責,都毅然選擇留喺香港,其他人有能力喺度守護香港現有面貌嘅人,有咩理由恐懼?又有咩理由捨我哋而去?如果香港再冇香港人,我哋為咩而坐監?政治犯嘅存在,係應該令港人更加堅強、信念更加茁莊,證明政權濫捕策略係枉費心機嘅;而唔應該係令香港人意志消沉、忘記初衷,製造政權成功遏止民主運動嘅歷史事實。

成日話唔知留喺度有咩可以做,一齊出聲努力抵抗移民潮就已經係每一個人嘅當務之急。兄弟爬山總唔可能係我爬獅子山而你爬阿爾卑斯山。我已經盡咗力兌現對其他手足許下過嘅「齊上齊落」承諾,我最大心願係將來出獄仍然可以見到我心愛同熟悉嘅香港,而非深感決定留港坐監係人生最on9嘅抉擇。如果無力感侵佔心志,請記住你仍然有能力協助我同好多在囚手足達成呢個心願。

喺咁熱嘅天氣下要寫信真係好吃力,比起之前春天起碼辛苦兩倍。但係我知你一定會好想收到我嘅信,所以我一定會努力堅持,但可能真係未必每日寫到四版,或者有時要拖遲一兩日先寄出。希望八隻長毛貓 + 唐貓唔會熱死啦!睇到隔離營啲人投訴冷氣太凍真係X出聲。

Love you,

Ven

11/5/2021


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe