《蘋果日報》管理層今午（23日）宣布午夜後即時停止運作，有市民冒著滂沱大雨前往壹傳媒大樓，希望向《蘋果》道別。
居於新界西的吳小姐，今日專程花兩小時來到壹傳媒大樓，冒著大雨站在大樓外，只盼拍照留念告別《蘋果》。「我特登想留張相嚟留念，因為唔知下一步係點，分分鐘連相都冇得留念，咁覺得好可惜囉。所以希望擺張相留念，俾自己留返個回憶喺度。」
對於《蘋果》即將停運，吳小姐慨嘆十分可悲，也無奈除了每日買一份報紙，不能做到更多。「其實我哋一個普通市民做到啲咩？我哋做唔到啲咩，做到嘅只係希望企喺度支持蘋果，叫做一分心意。」她慨嘆：「唔會改變到㗎而家香港社會，因為呢個政府已經唔聽我哋所有人嘅聲音、民意。」
吳小姐形容，《蘋果》的價值在於它敢於報道真相。「佢嘅價值、意義係佢報道真相，同其他所有嘅傳媒不一，因為有啲真相其實好多報道都無⋯⋯ 有啲真相、真理，我覺得只有喺蘋果先睇到。」她希望《蘋果》的員工不要氣餒，繼續加油，以平靜心情面對今次事件，又盼望所有員工能「捱得過」。
蘋果讀者陳小姐手持今日的《蘋果日報》在蘋果大樓前留影，「希望可以同佢say個 proper道別。」去年8月蘋果創辦人黎智英被捕後，她曾在蘋果日報為她的小店落廣告「撐蘋果」。
她坦言：「其實預料有呢一日出現，只是幾時發生，冇諗過咁快。」她哽咽著說，認為蘋果對於她來說不僅是份報紙，更象徵著香港精神，如民主、自由。她拿著報紙哭著笑道：「依家呢份報紙變成有收藏價值。」
有人則在壹傳媒大樓外貼上便利貼，寫道：「自古至今，蘋果都好特別，以不同的形式改變世界，有幸香港亦有這類特別的蘋果，我愛蘋果，我哋等您回來！」亦有市民自製過了膠的防雨「心意卡」，張貼在蘋果日報大樓門外，向蘋果員工表示感謝和打氣。
親建制人士在大樓外開香檳
親建制人士傅振中等人傍晚6時到壹傳媒大樓外，開香檳慶祝《蘋果日報》結業，又播放《喜氣洋洋》，其中一人說：「你哋啲手足日日嚟呢度拜都得啊！」在場支持《蘋果》的市民與他們對罵，又質疑他們「收咗幾多錢呀？」有市民批評他們在場開香檳是亂拋垃圾。
現場部分採訪的記者亦對傅振中等人的行為顯得不耐煩，高呼「快X啲啦」，「你唔X好噴到我哋啲機啊！」
