眾新聞 Logo
眾新聞 CitizenNews
眾說

睇奧運之餘,唔好中計


今早在電視上看港隊泳手何詩蓓勇奪女子200米銀牌,我同全港巿民一樣拍爛手掌大力歡呼。張家朗日前取得花劍金牌,今屆港隊已漂亮地創造歷史。特別在這政治氛圍下,對香港人的身分認同感而言,這實在是一劑強心針。

今屆奧運於香港成為熱話,除港隊成績史上最佳外,政府出資購入轉播權,讓電視台免費轉播相信亦是主因。但見林鄭及其他司局長日日笑騎騎講奧運,爭住出post不只,徐英偉之流連去立法會都要著住運動裝。所以,你真係唔好怪我,懷疑政府忽然善心出資購入轉播權,其實只係一場交功課轉移視線的公關騷。

林鄭問責班子今早一齊睇何詩蓓出賽,做哂公關騷。政府新聞處照片

點解我會咁諗?首先睇睇時間軸:

早在2020月2月,東京奧運因疫情宣布延期一年,當時港協暨奧委會副會長霍啟剛已表示去信特首,要求購買東奧轉播權,免費供電視台轉播。及後到2020年4月7日立法會財委會,兩名議員陸頌雄及劉國勳,亦有書面提問政府會否購入轉播權。換句話說,其實要求政府買轉播權呢件事,一早吹奏咗好耐,只係政府一直唔理唔做。

當時,時任民政事務局局長劉江華對提問不置可否,只係話過往轉播權均由商業市場落實。之後過多兩個月佢就被炒魷,之後又換多件民建聯做局長,件事就自然更加不了了之。

政府是在今年五月初公布購入轉播權。但其實霍啟剛在今年四月接受訪問時,仍然呼籲政府購入轉播權。照計如果政府一早決定俾錢,霍公子冇可能會唔知。

換言之,政府忽然轉軚,係四月到五月之間的事。

事實上,雖然坊間一直有聲音要求政府俾錢,但政府卻一如往常地已讀不回。按政圈中人所講,原因是奧運轉播權並不便宜。

根據資料,2012年倫敦奧運由有線電視投得,費用為1.2億港元;2016年里約熱內盧奧運則由無綫電視以1.5億港元購得。至於今屆要幾錢,林鄭一直唔肯公開,只係話平過以前,但過億一定走唔甩。以林鄭過往作風,要娛樂港人,必定唔做,更何況要使一億?早前鄭州水災,阿爺搵錢,姐姐都識自動獻身捐五十萬,林鄭政府就一蚊都冇捐,唔似佢作風是吧?

今次佢轉軚,我諗到有兩個可能:

第一,係俾人照肺。今年三月,林鄭及澳門特首賀一誠上京出席全國人大會議,接見佢哋係主管港澳事務的副總理韓正,同場仲有國務院港澳事務辦公室主任夏寶龍。當時韓正對賀一誠的抗疫工作大加讚揚,但對住林鄭就話,十分關注香港住屋問題,香港社會貧富懸殊太大,認為社會要安定,需解決房屋問題。當時林鄭上京前話會要求同大陸通關,但依家通成點,大家有眼見。

既然公開場合都咁講,在閉門會議內,我估林鄭應該唔會好過。特別係韓正講過話曾經同港區人大開會交流,林鄭萬箭穿心幾可肯定。於是,佢返香港後就摷返奧運轉播權出來,期望挽回一下民心,係好合理推斷。

第二,係轉移視線:在奧運期間,香港政局發生了一件足以影響後世的重大事件,那就是唐英傑案。唐英傑被控「控煽動他人分裂國家罪」及「恐怖活動罪」,最高判刑係終身監禁。因此案是《港區國安法》首例,未來國安法都會以此案為量刑起點。更會對何謂「恐怖活動」、「分裂國家罪」寫下具體定義。

此案之重要,對香港人之影響深遠,如果沒有甚麼大事轉移港人視線,定必會成為全港輿論焦點。於是,我很合理地懷疑,政府得知聆訊日期後,急急拍板購入轉播權,正是要借奧運熱潮,掩飾政治上的醜陋。

除唐英傑案外,香港其實還有極多問題亟待解決。房屋經濟那些千古問題不說,特首受唔受《防止賄賂條例》監管,又使唔使傾?

我只想同大家講,港隊當然要支持,身為香港人,本就應該為香港歡呼。但睇還睇,對政府買轉播權就要有保留。如果大家因為這些小恩小惠而忘記了唐英傑案、忘記了香港的前途,我寧願上網睇奧運好過。


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe