眾新聞 Logo
眾新聞 CitizenNews
眾聞

獲浸大頒榮譽博士學位 發哥感言:「香港人畀咗好多鼓勵、包容、愛錫!」


現年66歲的「發哥」周潤發,今日(7日)獲香港浸會大學頒授榮譽人文學博士學位,表揚他的專業成就,以及對社會的卓越貢獻。這是「發哥」繼1999年獲香港演藝學院頒授榮譽院士、2001年獲香港城市大學頒授榮譽文學博士之後,第三次獲專上教育學院頒授榮譽名銜。

從主辦單位提供的現場相片可見,一頭白髮的「發哥」身穿畢挺西裝現身會場,英氣十足,他隨後於台上致謝辭,感謝浸大頒授博士學位,並感謝香港人和香港這個地方,賦予他智慧同愛。

周潤發獲授浸會大學榮譽人文博士學位。香港浸會大學提供
周潤發在台上發表致謝辭。香港浸會大學提供

「發哥」早於17歲時已為幫補家計而輟學,對此他笑言講到讀大學,母親最有先見之明。「她很有遠見,60年代帶我飄洋出海到香港(舉家從南丫島搬到九龍區),讀『香港社會大學』,當時我得10歲!」

「發哥」回想當時的香港,經濟仍未起飛,大多市民都過着窮困生活,家住舊唐樓,一間屋便住了30多人。「我、家姐、細妹、外婆瞓張碌架床喺廳,亦有啲一家七、八口住一間房,走廊都有三張碌架床,環境好惡劣,對我一個鄉下仔來講,壓迫感好大。」年紀細,無法改變現實,惟有在日常生活中找樂子,「所以我成日去睇五點半公餘場,當時前座(收費)兩毫子、後座四毫子,其實唔知套戲做乜,我只係鍾意歎冷氣。」

經過長時間薰陶,或多或少影響「發哥」的人生路,去到70年代,他決定報讀邵逸夫爵士開辦的「無綫大學」,即無綫電視與邵氏兄弟合辦的無綫電視藝員訓練班第三期,他當時18歲。入讀藝訓班一年之後畢業,自此「發哥」便日以繼夜,夜以繼日的演戲唸對白,「每日不停講,06(早上六時)開始,外景講,返到廠(繼續),連瞓覺都係講對白,九年來都係咁,你問我拍咗乜?真係唔知!」他指出,去到80年代迎來第一個事業巔峰,留在電視台的時間,比在家的機會還要多,「(當時)見到最多嘅唔係我阿媽,係鄭裕玲,日日只係唔見幾個鐘,佢係响電視台陪我最多嘅藝人。」

演罷《上海灘》(1980)許文強之後獲得超高人氣,1981年他接拍許鞍華執導的《胡越的故事》,1984年再演許導的《傾城之戀》,事業版圖漸漸由電視界轉向電影界。「發哥」說:「80年代新浪潮(導演)回流香港,1984年我入咗『電影工業』呢間大學,而呢班新浪潮導演帶畀我嘅,係以前電視台導演畀唔到我,對白亦唔使講咁多,好好彩!1986年拍咗吳宇森導演嘅《英雄本色》,打後10年都响『槍林彈雨』下過,我可以講,(當時)我開槍用嘅子彈,多過當年『一哥』(警務處處長)。」

及至1994年,「發哥」與電影公司的合約結束,他到美國進修,1996年接拍第一套西片《血仍未冷》(The Replacement Killers/1998年上映),之後再拍《再戰邊緣》(The Corruptor/1999)和《安娜與國王》(Anna and the King/1999),惟發展未算順理。「好彩到99年,李安導演保薦我去咗北京大學,拍咗《卧虎藏龍》,一拍就拍到而家。」他總結這些年來在影圈打滾經歷的轉變,由講廣東話,到荷李活講ABC,再到中國大陸講Ji Qi Xi,適應能力如此強,是現實使然,「其實係迫出嚟,嗰陣時要搵食,响片場百幾,甚至幾百人等住你,冇得做唔到。當然,香港人畀咗好多鼓勵、包容、愛錫!仲有好多謝香港呢個地方,賦予我很多智慧、很多patience同愛,再次多謝香港人,多謝香港呢個地方,多謝各位!」

頒授典禮結束後,「發哥」隨即出席閉門分享環節,有大約200名浸大學生出席,惟院校方沒有安排傳媒採訪。