眾新聞 Logo
眾新聞 CitizenNews
眾說

從【大叔的愛】講到保險


【撰文:保險代理公司主席保險仔】

早前港產電視劇,至 hit 嘅非【大叔的愛】莫屬!呢齣「神劇」能家傳戶曉,係有一定嘅社會基礎嘅。話說中大喺2019年,做過一項社會調查,發現有六成受訪者同意立法保障不同性傾向人士。與此同時,台灣正在通過同性婚姻合法化,香港亦前後出現唔少與同性傾向有關:婚姻、公屋申請、遺產繼承等等嘅官司。可見LGBT(男、女同性戀者、雙性戀者和跨性別者)已經係不容忽視嘅社會普遍現象。「東奧」剛完,期間運動員嘅跨性別情況,又成為好吸睛嘅話題㖭。

LGBT社群如何在保險範疇中投保及索償?

雖然同性婚姻在香港仍未合法化,但同性愛侶關係在保險範疇中,又有乜嘢處境呢? 

人壽保險中嘅受益人:

壽險中嘅保險受益人,隨着固定關係及家庭關係嘅定義日益寬廣,香港已有部份保險公司接納同性伴侶作為受益人。同性伴侶受益人,只需証明係依靠或互相依靠下共同生活,咁就可以確立可保利益(insurable interest),自然有資格成為保險受益人啦。當然,每間人壽保險公司嘅定義有別,投保時,最緊要問清楚至好呀! 

話雖如此,若擔心身故後,家人會跟同性愛侶爭身家嘅話,咁就唔好嫌煩,嗱嗱臨做定張「平安紙」(遺囑),咁就萬無一失喇! 

醫療保險:

若係屬個人醫保嘅範圍,保險公司嘅核保範圍,只涉及投保人嘅身體狀況,唔會將投保人嘅性傾向作為核保之列,故投保書內唔會問及個人性傾向,亦唔會因性傾向而要求投保人做醫學驗身嘅。投保人只需如常如實填報清楚病歷、身體狀況同埋生活習慣(如是否吸煙者)就得㗎啦。

若屬個人醫保,不會因性傾向而被要求做醫學驗身。

至於團體醫療保險,好多大企業採用嘅醫保計劃,都有保埋僱員嘅配偶。咁「配偶」係咪一定指法定配偶呢?答案係不一定!僱員只需要証明伴侶同居達到或超過保險公司指定嘅時間,毋須註冊結婚證明,亦唔駛理會性別或國籍,僱員嘅同居伴侶係會受到醫保保障,與法定配偶無異。現時,香港已有保險公司實行緊呢種做法。(每間保險公司醫保條款不一,投保人要問個清楚!) 

樓宇按揭保險:

銀行提供嘅樓宇按揭保險,一般會接受同性伴侶申請,按揭人只須喺按揭申請表內,填寫關係為:配偶、未婚夫或妻就可以。無論申請嘅係6成抑或9成按揭,同性伴侶都會被視作直屬關係,而且唔駛提供證明㖭。 

家居保險:

就一般家居保險嚟講,保險公司核保嘅基礎,只會針對樓宇狀況,而不牽涉投保人嘅性傾向。換言之,保險公司喺不論投保人嘅性取向大前提下,提供個人意外、家居財物及業主公共責任保障。(要特別留意,若家居保險有提供同住家庭成員嘅人身意外險嘅話,保障範圍多數係指法定配偶、子女和同住父母。)

保險對投保人的同性伴侶也有一定的保障。

目前,喺保險範疇中,對同性伴侶嘅保障,雖不可同法定配偶等量齊觀,但亦相差無幾。相信假以時日,隨着社會對不同性向嘅接受,保險業界亦會與時並進嘅。 

作者簡介:保險仔,從事一般保險中介服務達四十年,期間,經歷保險市場及政府對行業的行為規管,隨時日不斷改進,日益成熟。目前,現職保險代理公司主席。