眾新聞 Logo
眾新聞 CitizenNews
眾說

你不理財,財不理你,之後侷玩魷魚遊戲!


【撰文:保險代理公司主席保險仔】

早前,保險仔同埋其他同事,不約而同齊齊煲韓劇:魷魚遊戲。 

Lunch time喺公司度,各人手中拿着飯盒,邊吃邊熱烈討論這部hit爆連續劇。

同事間都對劇中每個以性命相搏嘅遊戲,多角度咁分析箇中嘅寓意,包括:人性本惡抑或本善;人性喺遭受考驗下出現嘅陰暗面;團隊精神;簡單的兒童遊戲規則,都可以同時係生死賭博;呢個世界有沒有真正的民主同埋自由選擇權……等等。

魷魚遊戲劇照。

同事對劇中各種遊戲所暗示嘅人性表現,各有睇法,保險仔都表示同意。但保險仔有一啲想法,同佢哋只係集中咗喺每個遊戲之中嘅寓意有所不同。保險仔不禁要問,重返參加遊戲嘅人,都係經過第一輪大規模屠殺血洗後嘅倖存者。佢哋明知呢個係賭命遊戲,並且喺第一輪遊戲後,害怕得立刻要大家投票,幾經辛苦,人數剛好過半數,同意退出遊戲,先至可以保住條命仔,離開現場。依家,餘悸猶存,何解又甘心情願返嚟搵命搏呢? 

「喂!保險仔,你整乜呀?粒聲唔出,又發乜嘢吽呌呀?」高佬泉(佢其實身高五尺一吋)笑問。

「下?啊……我係度諗緊,點解明知隨後啲遊戲全部都係玩命嘅,都要搵命搏呢?」我問。

「為咗嗰四百五十六億韓圜囉!」大家夾都冇咁齊咁嚟答我。

「咁比着你哋,喺地鐵有人撩你玩劇中開頭嘅擲紙牌遊戲,你哋會唔會玩呢?」我問。

「睬佢都傻啦!為咗嗰六百零蚊港紙,玩輸咗俾人刮一巴,傻嘅咩?六百蚊,我冇咩?」高佬泉搶住答。

「咁你點解可以唔睬佢,劇中主角就要侷同佢玩?」我接着問。

「……」大家都有點語塞。

「咁我再問啦……即管你面對住四百五十六億韓圜(即三億多港幣),如果明知要搵命搏,你又會唔會落搭吖?」我問。

「梗係唔會!命仔嚟㗎喎!」大家齊聲道。

「你哋剛才討論咗好多不同遊戲下,各人表露出唔同角度同程度上嘅人性陰暗面,其實都係miss咗個最初亦係最緊要嘅前提:唔係愛,亦都唔係責任,係錢!錢唔係萬能,但冇咗錢,就真係萬萬不能!當一個人去到山窮水盡,欠下咭數、貴利、翻身無望,走投無路嘅絕境中,究竟會點?正因如此,劇中嘅每個奪命遊戲先至會有人玩,整齣劇至有說服力。 

睇番劇中除咗少部分個別嘅參賽者外,都有共通嘅缺點,先至造成佢哋嘅失敗人生,侷住用條命嚟參與遊戲: 

1) 你不理財,財不理你!

劇中主角成奇勳同埋佢嘅高學歷鄰居好友曹尚佑,都係代表不善理財一類。成奇勳本來可以安安份份做代駕,簡簡單單咁過活。但佢偏染上賭癮,結果當然欠下一屁股高利貸。佢個好友尚佑,出身名門學府,喺財金機構做高層,理應係高收入人士,但係佢衰在貪念和急功近利,竟然不自量力,投機高風險期貨,結果搞到要穿公司櫃桶底,連媽媽嘅魚擋都押埋不特止,更欠下60億巨債,翻身無望。可以講,兩者都將人生搞衰在喺貪念同埋不善理財之上。

你不理財,財不理你!

其實喺佢哋嚟講,安份生活,每月適度用錢,量入為出,有餘錢嘅,就可作穩健投資。雖然唔會令你發達,但都可以確保資產得到合理回報,達到保值效果。當然,今時今日,單靠銀行儲蓄,利息有等如冇。若要有高回報,當然風險亦高,呢個就要認真估量一下自己嘅承受能力。我哋一般打工仔,買樓投資就無望啦,但係又唔使咁絕望噃。市面上,仍有唔少嘅理財產品可以考慮。其中:長期保險、儲蓄保險、年金等,都係唔錯嘅選擇,一般嘅回報,都會跑贏通脹,等自己退休時,唔使淨係得份MPF咁少呀嘛! 

2) 切勿輕易斷供長期保險!

成奇勳因為好賭,連媽媽份醫保都cut咗套現,唔使問梗係輸埋啦!媽媽身患糖尿重病,要做手術,結果冇錢就醫。等到佢喺魷魚遊戲過五關斬六將,贏得最終獎金四百五十六億韓圜回來,媽媽失救下,早已病死在家中。呢個慘劇,其實絕對可以避免! 

可見,任何嘅長期保險,切勿輕易斷保呀。 

此外,有唔少人,因依家身體年青力壯,諗都冇諗過自己會有患上重疾嘅機會。所以,好多年青人都冇買醫療保險或危疾保險嘅。假若一個唔好彩,病魔來臨,屆時有份保險可幫忙,咁就唔使咁臨急抱佛腳,更唔使因個病要牽累家人啦。

切勿輕易斷供長期保險。

3) 事事要有獨立思考,切勿人云亦云!

劇中嘅尚佑,因其高學歴,喺佢嘅團隊中,都係由佢出謀獻策,大伙都深信不疑。但係權威唔等於無條件要信晒佢嘅。最明顯就係偷渡客阿里,在彈珠遊戲中明明已經取勝,但輕信尚佑胡言亂語,被尚佑暗中用石仔偷換咗自己贏番嚟嘅彈珠,最終因盲目輕信權威,令自己輸掉遊戲,賠上性命。 

話說回頭,講番好多保險客戶,其中都有唔少人對自己份保單一知半解。佢哋好多時侯,求其有朋友買咗嗰份保險,佢哋就跟風照買同一份,期間冇認真諗過份保單嘅條件,適唔適合自己。此外,亦有啲保險中介人,只求賣單,不理投保人嘅條件合唔合適,hard sell 啲客人買。保險仔就真係有朋友,佢係單身婦人,七十歲,無正常收入,但有多少積蓄同埋自住物業,竟然有中介人sell佢買融資保單,仲教佢要啲仔女同佢喺銀行做擔保人!由於係槓桿倍大,故利息加花紅,可以五年就回本咁話。但其中嘅風險,包括未來銀行可能會增加利息;銀行亦可以隨時因應環境終止抵押借貸;保險公司在未來亦不能確保可達目標利潤等等。呢啲,中介人都冇一一同佢講清楚。保險仔呢位朋友,幾乎落搭。好彩佢多問幾個在行嘅人,紛紛都勸佢小心,佢先至明白呢份融資保險絕對唔啱佢。」保險仔講到呢度,就提醒啲同事們好快啲扒埋兩啖飯,因為就夠鐘開工啦! 

魷魚遊戲這齣韓劇,透過簡單嘅兒童遊戲,亦即係零和遊戲規則(只有勝與負,沒有雙贏,只有最後勝利者,其他失敗者都會遭受淘汰嘅)。但現實的人生中,果真如此嗎?其實,正如劇中說明,這個賭命遊戲,並非強制性的。假若我哋係一個量入為出,審慎理財,不貪心投機、豪賭嘅人,根本冇可能置自己於絕境,更不可能侷住參與呢種賭命遊戲。人生中,並唔係樣樣嘢都係你死就係我亡嘅。其實,只有帶賭博或對峙性質嘅活動,先至會出現零和嘅勝負。剛剛同賭博相反嘅,就係保險。雖然大家都是依仗發生嘅或然機率而製訂賠償的細則,賭博係有輸贏,但保險係唔會有贏家嘅。 

第一,你買保險,買中咗,你話你係輸定贏?第二,咁唔好彩買中咗,所遭受嘅損失,將會得到賠償。保險公司並唔會因為你買中咗而變成輸家,因為一來佢哋係經過龐大數據同埋慎密精算賠償機率後,才釐訂保率。再者,保險公司喺收到客戶投保後,就立刻進行再保(reinsurance),令到賠償風險得到分攤,最終使到投保人同埋受保公司能夠穩健持續,達至雙贏。保險最終嘅原則,係賠償投保人喺意外後遭受嘅損失,而賠償額係唔會超過實際損失嘅。所以,買保險係唔會令人致富嘅。 

話雖如此,買保險係絕對會令投保人喺受到人命、財物或產生第三者賠償責任損失時,得到保險賠償,咁樣投保人或者佢嘅家人嘅生活,就可以過得平穩安定得多啦。 

作者簡介:保險仔,從事一般保險中介服務達四十年,期間,經歷保險市場及政府對行業的行為規管,隨時日不斷改進,日益成熟。目前,現職保險代理公司主席。


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe