眾新聞 Logo
眾新聞 CitizenNews
眾說

進入校園要掃「X心出行」?


論盡教育界,因為時下嘅香港教育界,真係有唔少論盡嘢。

就好似前幾日睇到新聞報道,話香港有某間中學嘅校長好希望師生盡快安裝政府嗰個「X心出行」app。呢位校長話,為咗配合通關同埋為社會防疫出一分力,準備喺聖誕同元旦假期後,明年一月初復課時,就要求全校共約900名師生進入校園時都要掃一掃政府個「X心出行」QR code。

真係超級搞笑。

其實阿校長到底知唔知嗰個「X心出行」係用嚟做乜嫁?

呢個app係話,幫市民紀錄進出嘅不同場所同埋時間,咁如果某個場所出現咗確診個案,個app就會自動通知嗰啲曾經同感染者同時到訪嗰個場所嘅用戶。

問題嚟喇。如果你間學校真係有人確診咗,乜你無「X心出行」app 就唔知道邊啲學生邊啲老師係曾經有番過學校咩?莫非你間學校係唔使學生 take attendance 唔使老師簽到架咩?

如果你間學校有正常嘅學生點名教師簽到,咁你要全校師生每次進入學校都掃一掃個「X心出行」,就完全係多此一舉,無事搵事嚟做。

我心諗,乜原來依家香港地,咁低智都可以做到校長,仲要好主動咁話俾記者聽原來你係咁低智。

我將呢則新聞 share 俾朋友睇,咁朋友就話我知呢間學校嘅背景。OIC!咁可能呢位校長係知道「X心出行」其實真正係用嚟做乜啦。