眾新聞 Logo
眾新聞 CitizenNews
眾說

新天新地 心繫香港


已經有一年幾無喺衆新聞自己專欄寫文章,琴日(3日)喺倫敦睇咗關於梅艷芳生平嘅戲,先知道佢四十歲咁後生就過身。佢係一個天才橫溢,自小經歷風浪而又對社會做咗好多貢獻嘅藝人,心裡面好佩服。加上聽講佢仲係積極參與拯救八九六四民運人士嘅黃雀行動,再睇番而家香港好多佢嘅同行,更加覺得佢就係一粒巨星[1] 
 
同我一齊睇梅艷芳嘅都係啱啱嚟到英國一年半載嘅香港人,有啲大家以前唔識,亦有多年熟朋友。想唔到呢套戲一票難求,嚟咗嘅香港人都想重溫昔日熣燦耀眼嘅香港歲月。講起嚟都奇怪,嚟咗倫敦差唔多一年,我認識咗好多朋友,其中大部份香港人,有啲嚟咗幾十年但絕大部份係嚟咗一年半載。認識嘅香港人中,有幾個特點。其中之一係全部人傾計都唔會淨係寒喧幾句就算,而係大家都好願意講晒自己同家人所有情況,住屋、學校、做嘢、生活鎖事、未來計劃,乜都講,有碗話碗有碟話碟。相對於以前喺香港,識親新朋友,即使喺教會嘅弟兄姊妹,總係大家好有隔閡,一般只係講吓d普通嘢,好少講自己屋企情況同家人,更加唔會講自己計劃想做乜。

資料照片

嚟到英國,好似大家都放開懷抱,好有共同話題,好放心去分享,甚至互相介紹朋友同埋生活上嘅貼士。另外一個特點就係所有人都好歡容,甚至好開心,時常家聚,探朋友,個個禮拜飲茶食飯,喺屋企煑飯食招呼朋友,互相介紹新朋友。大家都好願意分享自己買樓樓價,租屋租金,又或者買樓收租搞生意,搵乜嘢工,幾時同邊間公司見工,見工見成點,大家乜都講。可以話完全打破咗階層同行業身份,大家都好有認同感同信任,好容易成為咗好多計傾,好鐘意來往嘅朋友。
 
其實我識嘅成班香港人,好多都已經唔後生,大多數起碼四五十歲,想唔到咁多到咗嚟個年紀都移民嚟英國。呢班中年人有啲仔女過埋嚟,有啲阿媽隻身跟個女嚟,仲有啲係無結婚自己一個人過嚟。有啲搵緊工、有啲諗住學新嘢轉行、有啲投資物業、有啲想搞生意、有啲受咗訓練之後做義工仲係幫助本地人解決日常生活問題、有啲重操故業、有啲就係過退休生活。好有趣係個個都放低身段,好願意重新嚟過。咁嘅年紀都可以的起心肝,重頭適應,真係有啲令人驚喜,最重要個個都幾開心。
 
感恩嘅係喺教會又認識好多年輕人,二三十歲甚至讀緊書,全部好積極,好願意交流,好熱誠。感覺上佢哋年輕人好多諗法亦比較容易搵到工。喺呢度教會,每個禮拜都有幾個第一次嚟教會嘅新人,崇拜之後㗎啡茶聚每次都認識好幾個弟兄姊妹。可以講,參加咗教會一兩個月所認識嘅弟兄姊妹,比起我以前喺香港一間傳統大教會幾年認識嘅人嘅總和仲要多,而且嚟到大家仲好熟落。
 
我由出世到嚟英國之前,住咗香港幾十年,都無真係打算移民。嚟咗之後更加覺得以前話離鄕別井,淪落天涯,呢啲舊概念真係已經同時代脫晒節,out晒!其實,喺疫症之前相信好多香港人為咗工作同生意已經成日周圍飛,喺外國生活同移民都已經好平常。加上好多人平時都負擔得起機票錢,又有互聯網資訊同埋打免費電話,仲可以視像,反而真係天涯若比鄰。可以講我認識嚟咗呢度嘅香港人一樣好關心香港嘅嘢,有啲喺度嘅香港朋友,香港事無大小都第一時間分享評論暢所欲言,仲同親朋戚友保持緊密聯繫。

資料照片

講到有無歧視,相信絕大部分嚟咗英國嘅香港人都唔會覺得有乜問題。一來英國政府對BNO香港人同本地人差唔多一樣待遇,根本就無差別。以倫敦為例,嚟咗個幾月,已經可以投票選倫敦市長,六十歳以上就可以免費坐倫敦地鐵同巴士。至於睇醫生,小朋友讀中小學亦同本地人一樣,當然又係梗係開心咗喇!喺倫敦有個更加有趣現像就係本地英國人白人只係小數,其他種族嘅英國人同世界各地嘅人係大多數。當然,倫敦真係一個Global Hub全球樞紐。而英國又因為以前喺好多國家曾經殖民,所以對好多國家唔同種族嘅文化都好有瞭解。所以喺英國,政府同英國人都好強調佢哋係多元文化。我喺英國認識一位早期印度裔由烏干達移民嚟英國嘅朋友,佢同我講話英國本地人唔會要求唔同種族嘅移民變成典型英國人。而係所有種族嘅英國人都可以保持番自己種族嘅文化、語言同生活方式,相互尊重。
 
寫緊呢篇文嘅時候,收到一條新聞,話要係未來幾年大力提高普通話喺香港嘅普及應用率,換言之第日香港所有正式場合都唔准講廣東話,全部以普通話代替。呢則新聞加埋近兩年香港發生嘅改變,令我想起聖經裡面《出埃及記》嘅故事。裡面提到埃及王因為生怕住喺埃及嘅以色列人生養眾多,將來有一日威脅佢哋嘅統治,於是苦待以色列人,強迫以色列人做苦工,又要殺晒以色列人所有初生男嬰。以色列人因為做苦工歎息哀求。神聽到以色列人的哀聲,召喚摩西領以色列人出埃及。但埃及王卻心裡剛硬,唔肯俾以色列人離開。每次遇到神降災難都答應咗,但之後又反悔,一直等到埃及經歷十災之後先肯比摩西帶以色列人離開埃及。
 
願神賜俾追求自由、民主、法治同埋普世價值嘅香港人全副軍裝,可以同嗰啲執政嘅、掌權嘅、管轄幽暗世界嘅,以及天空屬靈氣嘅惡魔爭戰到底![2]
 
註釋:

[1] 楊光宇先生喺2001年9月25日發現小行星,編號55384命名為Muiyimfong
[2] 以弗所書6章11至20節

 

編輯推薦:

《眾聲集》由「離」開始,香港人移民系列——英國篇