眾新聞 Logo
眾新聞 CitizenNews
眾說

聖公會煽動老師家長反政府


擁有過百間中、小學同埋幼稚園嘅香港聖公會,竟然涉嫌公開煽動老師家長向特區政府嘅管治表達不滿意不信任。真係大膽!

話說聖公會成立咗唔夠一年嘅教育服務部,喺近日發信俾轄下所有學校嘅校監、校董同埋校長,呼籲學校鼓勵老師同家長喺12月19號積極去投票。佢封信話,咁係「向學生樹立榜樣,展現如何透過選舉就社會改進作出建議。」

嘩!有無搞錯?聖公會咁做,擺明同特首林鄭對著幹噃。

聖公會咁愛國,唔係連著名愛國愛黨嘅《環球時報》都唔睇呀嘛?

《環球時報》專訪截圖。

林鄭喺今個月3號接受《環球時報》專訪時,咪講你知,政府工作做得好、公信力高嘅時候,立法會選舉嘅投票率係會低嘅,因為市民都無強烈訴求要選擇啲議員嚟監督政府咁解。

林鄭呢頭講完,聖公會嗰頭就公開發信,話要「展現如何透過選舉就社會改進作出建議」,潛台詞就係話林鄭領導嘅特區政府工作做得唔好、公信力好低,我哋有強烈訴求一定要揀啲議員嚟監督林鄭政府。嘩!諗唔到聖公會咁陰毒,暗串林鄭。

BTW,聖公會同埋佢呢個教育服務部嘅當然委員管浩鳴,煽動轄下百幾間學校嘅老師家長一齊上街投票表達對林鄭政府嘅不信任,從而煽動學生有樣學樣。聖公會同管浩鳴,騎劫咗教育界,令反政府情緒進入學校,情節嚴重。佢哋今次,係咪已經犯咗宇宙無敵國安法?

真係論盡。