眾新聞 Logo
眾新聞 CitizenNews
眾說

野豬出沒多留意,寵物惹禍小心啲!


【撰文:保險代理公司主席保險仔】

難得近排天色清朗,氣溫涼爽,正係行山好時節。Bobo一早約咗佢個好姐妹阿May今日weekend一齊到大潭水庫逛逛。講起行山呢家嘢,非保險仔強項,所以特別選擇港島大潭水庫呢條行山線,貪佢適合我哋呢啲行山BB班!講開又講,行山都要講經驗、專業先至安全㗎。早前發生過一單致命嘅行山意外,正正就說明:第一,對行山路線、難度、同埋自己嘅能力,要充分掌握。此外,切勿「孤身走我路呀!」 

隨便提一提,行山期間,發生意外導致傷亡,一般購有個人意外保險都會理賠(這要視乎個別保單保障內容而異,除意外身故外,身體受傷造成永久性傷殘,即使是手指尾喪失活動能力,也會按比率賠償)。若喺意外險中附加醫療保障,咁治療費用就會按醫保部分所列出各種保障利益來理賠(現時大部分保險公司都會接受西醫以外的針灸同埋跌打𠻹)。之不過行山唔等於攀岩活動!若行山路線中,有攀爬路段,需要攀岩,呢啲係高風險活動,保險公司可能列為不保事項。咁計劃行程時,一定要量力而為外,仲要睇清楚張保險單保唔保。唔清楚嘅,就唔好怕煩,問問保險公司或中介人。 

一路上,Bobo同阿May好多密偈傾,保險仔當然識做,特登行慢兩步,做跟尾大班!「呀……!」Bobo 同阿May齊聲尖叫!嘩!連保險仔都嚇咗一跳!驚魂未定,Bobo同埋阿May已經飛撲埋嚟,左右兩邊,攬到保險仔實一實!定過神來,原來前面遠處,有大大小小幾隻野豬正在路過。「定啲嚟,唔好叫,企喺我後面!」保險仔故作鎮定咁話!(查實保險仔都有啲騰鷄㗎,不過冇法啦,男人嚟㗎嘛!梗係要保護女仔啦!)眼見啲野豬已離開,保險仔判斷應該已經安全啦,就話:「唔使驚!跟貼我後邊,淡定啲行,就算再見到佢哋,當佢隱形,保持距離就得㗎啦,千祈咪尖叫!」其實,啲野豬基本上都係怕人嘅。但係當佢哋受驚嚇時(尤其係有小野豬一齊),佢哋先至會襲擊人嘅。

行山期間遇野豬襲擊受傷,保險保唔保?

過咗一陣,聽到後邊傳來一陣談笑聲,回頭一望,原來係一群為數十多人嘅年青人。「嗱!依家我哋咁多人,莫講話野豬,連老虎都怕咗我哋啦!」保險仔安慰道。Bobo同阿May到家陣先至定番啲,慢慢又開始回復心情,邊走邊談笑。

「俾野豬撞親就冇仇報啫,假如行行吓街,俾人哋養啲寵物狗咬傷又點計呢?」阿May問。 

「Good question!話明係寵物狗,當然係有狗主人啦。狗主自然係有看管佢嘅寵物責任,佢同我哋一樣,對大眾都負有公共意外責任嘅。寵物狗係佢看管嘅範圍,若果寵物狗失控,咬傷途人,賠償責任自然係由狗主負責。受害人有權向狗主索償有關嘅損失。」保險仔答道。

被寵物狗咬傷,保險保唔保?

「哎吔!咁我出外溜狗時,我隻寶貝Dorie(Dorie係隻雪橇狗),如果佢發癲,我拉佢唔住,咁佢整到人,咁我點算?」阿May隨即想到佢隻寶貝Dorie。(阿May隻Dorie已經係成年狗,佢企起身有成個人咁高,不過一向都係好溫馴嘅。)

「Another good question!妳隻Dorie,係龐然大物,出外溜狗時,緊記必須戴上口罩同埋牽繩。作為狗主,要保障自已對公眾嘅意外責任,係有保險可保障嘅: 

  1. 寵物保險:市面上,大部分寵物保險計劃,都有為主人提供公眾意外責任險。當然,保障額係設有上限嘅。若碰到苦主索償嘅額度,超出保障上限嘅話,咁餘額就要自己貼啦。(特別留意,寵物主人必須履行各種合理安全措施,如替大型犬隻戴上口罩、牽繩、登記和打針等等。此外,要留意並非所有狗隻品種都受保嘅,如:從事競賽、特技、緝毒,又或攻擊性較強嘅品種,保險公司都未必受保嘅。)

  2. 家居保險:除咗寵物保險外,大家可能冇留意到其實家居財物保險裏面嘅公眾意外責任險,亦可提供到相關嘅保障。目前,不少保險公司都把家居財物險嘅保障範圍擴大,將投保人或同住家庭成員嘅公眾意外責任險保障,拓闊至包括寵物造成嘅公眾意外賠償責任。即係話,喺屋企或出外溜狗期間,狗狗絆倒、咬傷在家訪客或途人,狗主因而負上賠償責任,咁保險公司會就保單保障範圍負責理賠。

    注意事項:喺發生事故後,投保人切勿喺保險公司未允許情況下,私自同對方承認責任或作出賠償。此舉係有違保單條文,造成保險公司拒絕理賠嘅。正確做法係先報警,並立即通知保險公司有關情況,以及傷者傷勢,聽候及配合保險公司嘅指示。

    家居財物保險中嘅公眾意外責任險,其實係好重要部分,尤其遇到第三者索償損失時,往往涉及到多種複雜嘅法律程序,非一般人可應付。索償額可大可少,連同訴訟費用,負擔極大。購有家居財物保險,受保人就可以交由保險公司,由佢哋嘅專業法律團隊代辦,咁就唔洗攪到自己搲到頭都爆喇!
不少家居財物險內的公眾意外責任險保障範圍包括寵物造成的公眾意外賠償責任。

話說回頭,貓狗等寵物始終係獸類,即使溫馴亦有獸性大發嘅潛在風險,除咗會對別人有攻擊性外,亦有機會反噬主人,導致身體受傷,嚴重嘅可以造成永久殘障(早年就有位女士俾鄰居嘅藏獒犬咬至重傷,右手終生殘廢)。前面提及過嘅個人意外保險同埋醫療保險,喺呢方面都可以幫到手啦。一般個人意外險都會提供因意外造成身故或耳目手足傷殘保障外,有啲產品會附加醫療保障,包括住院、手術同埋出院後要做嘅物理治療費用等等。」保險仔好詳盡向阿May解釋。

「咦?聽落我除咗個人意外保外,都要嗱嗱聲補買寵物保險同埋家居財物保險囉!」阿May聽後,好似恍然大悟咁! 

Bobo斜眼睥住保險仔:「你吖!行山都不忘sell保險!」「哈哈!職業病啫!……」保險仔一臉尷尬。 

作者簡介:保險仔,從事一般保險中介服務達四十年,期間,經歷保險市場及政府對行業的行為規管,隨時日不斷改進,日益成熟。目前,現職保險代理公司主席。