壹傳媒宣布賣《壹週刊》後，「堆填區」一片愁雲慘霧，《壹週刊》總編輯黃麗裳連日來以淚洗面，集團非執行主席葉一堅亦在Facebook嘆「情何以堪」。1990年開始跟黎智英打江山、曾任《壹週刊》市場及營業總監及《蘋果日報》行政總裁的何國輝，此時腦海冒起一個疑問：「我哋有冇檢討過，《壹週刊》點解死？」
曾經一手一腳創立壹傳媒的何國輝，回望離開17年的公司，向眾新聞記者回憶昔日的《壹週刊》精神，對照今日賣盤死因。
八九六四後，黎智英有意搞雜誌，當時才31歲、正於盛世廣告任職Associate Media Director的何國輝（Morris Ho），經同事潘啟迪及鄭經翰推薦給黎，負責sales and marketing。此後的十年，何國輝跟著黎智英開山劈石，由零開始建立起壹傳媒王國。《壹週刊》、《壹本便利》、《蘋果日報》、《忽然一週》、《飲食男女》……還有一早被遺忘的《賽馬天下》及《教師世界》，何國輝都有份籌辦。
何國輝當年率先用廣告人思維搞報刊，對傳媒行業造成天翻地覆的轉變，壹傳媒刊物的銷量屢創高峰，外界稱他為「魔童」、「神童輝」。何國輝曾經被視為黎智英的心腹智囊、壹傳媒的「橋王」，甚至有「小肥佬黎」的外號，但他自言不懂看人眉頭眼額，向來得罪人多，在壹集團時會頂撞老細，曾與黎智英吵得面紅耳熱，「佢（黎智英）成日話我最叻黑口黑面。到我走嗰陣，佢話我好真。」
何國輝記得，創業階段的黎智英，是個禮賢下士的老闆，肯聽意見，願意下放權力。何憶述，當年他負責為《壹週刊》找發行商時，某間為鄭經翰發行雜誌的公司，周圍跟人宣稱幫黎智英做發行，何國輝約對方飲茶，問發行的細節，對方只回應道：「你唔使（問）㗎喇，你老細搵咗我，你俾我得㗎喇，我搞得掂。」他聽到一頭冒水，再找其他發行商洽商，最終認為德強記最合適，便找黎智英談，「黎智英話，由你決定㗎，你搵啦。你睇到佢當時係將權力下放。」
90年3月15日出版的《壹週刊》創刊號，以許冠文「我想做總統」為封面故事，令大眾留下深刻的印象，但教何國輝難忘的卻是1月的試刊號，「嗰期封面講香港機場，題目大約係『陰霾下的XXX』，嗰本出到嚟，死人冧樓咁，好灰㗎。我哋準備咗好耐，個個諗住呢啲最掂，但黎智英睇完，直情係受到好大打擊咁樣，唔得，一定要推遲。」何國輝指，當時大家已經「熱晒身」，如箭在弦，若推遲必定動搖軍心，大伙兒於是一起去找黎智英理論，黎見群情洶湧，便批准如期出街。
到95年創辦《蘋果日報》，何國輝與黎智英又有意見分歧。當時他計劃推出《蘋果》報頭換印聖安娜65折餅卡，「聖安娜（餅卡）一般有75折，最低去到7折。7折只會閃一閃，所以7折嗰陣啲人就走晒去買，買定幾廿打，結婚嗰啲仲買得多。如果我剪咗報頭用65折換，咁就個個都揸住個報頭，發達啦！」但黎智英認為換餅卡不方便，應該憑報頭直接換西餅，「我同佢撐到好行，佢係好堅持，但我更加堅持。」計劃最終按照何國輝的意思進行，成功引起社會哄動，「成個marketing campaign只係用六十幾萬咋嘛，已經搞到成個香港反轉。」
何國輝又記得兩件小事。早期黎智英為吸納人才，以高於市價兩成的薪金請人，又想出了很多員工福利，包括找來太古城一間上海菜餐廳為員工準備飯盒。某日黎智英吃飯盒時，發現自己盒飯的雞肉特別靚、份量特別多，跟員工飯盒不同，黎一怒之下炒了那餐廳，「你當時擦黎智英鞋，係冇用嘅。」
那時還有個tea lady為伙記準備水果、茶點，試過買來菠蘿包，員工吃得津津有味，卻弄得辦公室一地麵包碎，惹怒了當時公司的「財爺」郭漢基。何國輝憶述：「Peter Kok（郭漢基洋名）媽媽聲，話唔好再買。黎智英就話，菠蘿包啲伙記最鍾意食，你咪叫佢哋食得小心啲囉，就捉住Peter Kok鬧。佢曾經係好人性（化），員工覺得咁唔係幾啱，佢第一個走出嚟指正你，佢會聽同事講嘢。」
何國輝指，黎智英曾經「好generous」，將報刊兩成盈利拿出來分給伙記，員工每月分紅，一年出到17、18個月糧。「黎智英最驚係咩呢？佢嗰陣時講呀，係嗰陣時，佢話，最驚一起身啲伙記走晒。呢個係創業階段。」
當年的黎智英會聽員工的意見，同時要求員工跟他一起聽市場的意見。已故中大工商管理學院教授梁覺早年曾為《壹週刊》、《蘋果日報》搞focus group，找到來自各階層的市民做小組討論，分析讀者意見。黎智英又請了林振強評書，林讀完一期《壹週刊》，就在雜誌上寫下意見，然後fax給黎智英、何國輝，另有同事將林的意見影印，確保開鋤書會時每人有一份。何國輝指，梁覺的focus group、林振強的意見，加上內部的鋤書會，有三個方面做quality control，「可以將編輯同讀者嘅距離拉到最近」。
「黎智英成日都講，放低你嘅包袱，learn from mistakes，聽個市場講，揸住呢3個大方向嚟管理、運作間公司。」何國輝舉例稱，94年鄭經翰遇襲，《壹週刊》以此為封面故事，但封面照片將鄭經翰面部瘀傷加工，《壹週刊》因而受到猛烈批評，黎智英出來認錯，親身示範有錯即改。後來發生「陳健康事件」，《蘋果日報》亦在頭版刊登全版道歉啟示。
「朝頭早講，朝頭早改，唔係等下晝㗎。最重要係，改嗰個成本，係黎智英俾㗎嘛。有個人不斷俾錢交學費，大家點解唔改？At least當時我哋呢班人係好相信呢個運作，所以基本上唔使點管，公司會愈行愈好。」
何國輝見證壹傳媒風山水起的第一個十年，2000年決定離開。他稱，當時與壹傳媒「和平分手」，不到一年後更應黎智英邀請回巢，為台灣《壹週刊》搞了一輪宣傳，黎請他留台發展壹電視，惟他對電視興趣不大，2001年底再次離開壹傳媒，自此沒有回頭。
何國輝離開後，壹傳媒相繼有8名高層離職。當時有報導指，他們9人一年人工超過8位數字。「以前係集體領導，之後可以話係黎生領導。」記者問，為何多名開國功臣在一年內陸續離開？何國輝欲言又止：「呢個唔係一個有組織嘅安排。每個人都有佢個故事。我第一次走，已經係覺得工作到盡頭，喺壹傳媒拎到工作嘅滿足感去到盡頭，亦都係時間換個環境，或者再抖一抖，睇番點樣再行上去。」
他其後轉投過星島、電盈PCCW Media及信報，08年入股鄭經翰牽頭的雄濤廣播（後易名為DBC），12年再與林旭華、鄭經翰等人創辦網絡媒體D100，大半生在傳媒界打滾。
如今何國輝以前朝臣子的身份看壹傳媒賣盤，他直指《壹週刊》是死於「國王的新衣」，敢於說真話的小孩子不見了。「我想攞番《壹週刊》精神（出來），我哋learn from我哋嘅mistakes。好可惜，而家講《壹週刊》mistakes嘅人，得我一個，其他人走晒去邊？」國王也有責任？「係，佢個管理方法就係，最終佢要自己揸住晒所有嘢。」
「佢其實係毛澤東嚟㗎。開頭打江山嘅時候，（權力）就俾晒伙記；到攞到天下嘅時候，有反對聲音嗰啲走晒㗎喇。留喺度嗰啲，留得咁耐，梗係講啲嘢啱佢聽啦。」
何國輝批評，黎智英太相信市場佔有率，「就係大台心理，同TVB冇分別。」
「當互聯網出嘅時候，你冇跟到或者跟得唔夠，你咪甩囉。一甩嗰陣，最大嗰舊互聯網咪將你整死囉。我覺得呢個係好自然嘅市場定律。」他指，《Washington Post》、《New York Times》轉型成功，是因為有熟悉編採的IT人才進行改革，但壹傳媒遲遲沒有行到這一步。
「而家打風，你喺窗口貼膠紙，係咁兒擋一擋雨。但係個風好大，點都將你間屋吹冧啦，唔係你修補間屋嘅問題，係你要重新睇個定位，呢樣有冇（做）呢？究竟《壹週刊》個空間定位喺邊度？」
何國輝續稱，當Amazon出現，Macy's、Sears等大型百貨公司相續倒下，正如Facebook等社交媒體冒起，衝擊傳統報刊。「點解Amazon會賣贏？其實係佢個IT、AI，你入到嚟本來（想）買一樣嘢，點知埋單時買多咗幾樣嘢。係喎，呢啲嘢啱我用，呢本書同其他書我都想買，不如一齊買埋，買多幾本又唔使郵費，Amazon提供好多incentive俾你。」
「Amazon係retail，我哋當佢（賣）content咁睇，作為一間傳媒，點樣learn from Amazon嚟令自己survive呢？你睇吓Next，佢仲用緊key word tag，大佬，key word tag係石器時代㗎喇。」
「將啲內容用數碼嘅format放上app或網站，呢啲叫數碼化咩？」何國輝指，現時網站、App的定位已經改變，媒體要懂得借助social media，將內容傳播得更遠、接觸更多讀者。《New York Times》2014年已經請Growth Editor分析數據，再制定策略，針對性地回應讀者的需求。「做呢啲當然（內容）量要夠，你壹傳媒嘅條件係夠㗎嘛，你做咁多內容。」
壹傳媒受政治打壓、被抽廣告，但何國輝並不認為這些是致命傷。「我怕咩俾人封殺？你黎智英都講，互聯網係liberate人類嘅資訊自由、資訊流通㗎嘛，亦都liberate你from大財團嘅封殺㗎嘛。」
「佢嗰時成日鬧我哋：『你班友唔好咁自滿啦。』Complacent，係佢開會最常用嘅一個字。變，係佢成日講嘅。Action before you think，又係佢講嘅。Learn from your mistakes，係佢成日講嘅。呢啲字，喺邊一年全部消失晒、唔再存在呢？」
何國輝小檔案
1984年：從加拿大回港，加入邵氏做製片，其後投身廣告界，盛世廣告Associate Media Director
1990年：任《壹週刊》市場及營業總監
1995年：任《蘋果日報》行政總裁
2000年：離開壹傳媒，其後回巢參與台灣《壹週刊》的籌辦工作
2001年：再次離開壹傳媒
2002年：任泛華集團控股有限公司(1105)執行董事、泛華雜誌集團行政總裁，專責監督星島集團雜誌出版業務，包括《東Touch》、《電腦廣場》、《Jet》等
2004年：離開星島集團
2005年：加盟電盈，任新部門PCCW Media董事總經理
2006年：離開電盈，全權代表李澤楷洽購《信報》，其後任《信報》董事
2008年：入股雄濤廣播，辭任《信報》職位後，任香港數碼廣播行政總裁
2012年：與林旭華、鄭經翰等人成立數碼電台D100
