【撰文：鄧永謙】
作者為新福事工協會關懷貧窮學校事工主任
今晚北角落區，見到熟悉的拾荒鄧婆婆手推車上已放了一盒月餅。婆婆話鐵盒裡面有兩個，而今天就已經收到四個月餅。佢仲話送月餅俾佢嘅人，都不約而同話：「我哋都唔食月餅嘅， 所以送俾你食。」
但係婆婆原來係唔食月餅，因為月餅好痴牙，所以佢收咗都唔會食。問婆婆點解唔拒絕呢？
佢話有些係盛情難卻，有些就好快擺低就閃人，唯有接受咗之後，諗吓又點樣散番出去。婆婆仲話佢都唔會帶番屋企，「咁鬼重仲周圍拎來拎去咩，盡量想辦法俾其他人啦，唔通益老鼠食咩！你哋要唔要番個？」
在再三推讓下，最終有位弟兄仗義（其實係勉為其難）幫婆婆分擔咗一個月餅，不過呢位弟兄都唔會自己食，而打算轉送給一位朋友嘅囡囡喎。
我哋同鄧婆婆講，今晚落嚟探你兩手揈揈乜都冇喎？婆婆就話，大家咁熟仲送嘢？你哋嚟陪我傾偈，陪我收工送埋我去巴士站搭車已經好開心喇！
最後，婆婆睇住嗰盒月餅，口中講咗句：「過兩日仲多人送餅嚟呀......」相信，未來這幾日，婆婆仲有排「忙」。
理解好多人都想關心社區嘅街坊，好想在節期表達一份心意。但係除了從我們自己的角度出發之外，又是否嘗試從對方的位置、角度及處境，去反思、修正及改革所做的行動？還是我們只是每年不斷地去重複、因循地去做我們仍然認為是合理和美好的事情呢？
有時候，某些事情表面上可能是給街坊一份祝福，但其實背係或許為對方帶來額外的負擔及煩惱，而是一直被我們忽略及鮮有作檢討而已。
