上周雨傘運動3周年，人們再聚「連儂牆」出席紀念活動。當日，除了一把把黃傘再現，身在獄中的「雙學三子」、「東北案十三子」，他們的臉孔透過一張張的水彩畫，重現昔日的金鐘佔領區。這些畫作是藝術家游樂，花了幾晚通宵趕工完成。
2014年傘運79日，游樂因身在澳洲，並無參與佔領。3年前貼滿便條紙的「連儂牆」、掛滿橫額的行人天橋，游樂都未有親身見證。雖然他未曾走過佔領區，在9.28發放催淚彈後幾天，他與其他留澳的香港人，自製雨傘運動宣傳單張，在澳洲珀斯四處遊走，希望突破地域界限，與香港人一同經歷這場佔領運動。
傘運過後，香港變得不一樣，游樂對香港的未來感到越來越灰，不過他選擇透過繪畫，繼續紀錄香港所經歷的社會大事。他希望，這16張笑容燦爛、色調溫暖的水彩畫，能提醒香港和他，不要忘記初衷。
傘運3周年集會過後，游樂的畫作暫時在油麻地的社區藝術空間「碧波押」展出。一張張熟悉的臉孔在畫中笑得燦爛，部份人的樣貌比現在更為青澀，游樂說：「我係突登揀佢哋比較開心嘅樣，有啲係用啱啱出嚟抗爭時嘅相、舊少少嘅相。譬如阿銘（黃浩銘）呢張係比較舊，係佢幾後生時嘅相，依家就肥少少，髮型都唔同咗。」、「我想remind每一個人嘅初衷，因為每一個人做抗爭，都有一個出發點。」
「我本身都有呢個諗法想畫，之後《社區公民約章》搵我畫其中4個人，我覺得唔好，一畫就畫晒。」為了趕及在3周年集會展出，游樂花了幾晚通宵，一口氣將16人畫齊，「一張用2、3個鐘畫，我諗有3日係狂畫，畫到夜晚凌晨4點，有啲畫到第二朝。」
「最難畫係何潔泓，係技術上問題，因為女仔通常冇咁多明確特徵，通常後生女、靚女都係差唔多樣。例如陳白山就易畫好多，輪廓突出。」
畫中一張張笑臉現已身處監獄，30歲的游樂在繪畫時也感到難受：「畫黃之鋒嘅感受較深，佢年紀比我細，但承受嘅壓力、面對嘅嘢相對大好多，自己除咗畫畫，冇咩做到。」除了目前被判監的16人，游樂打算繼續為社運抗爭被捕者繪像，早前圍堵港大校委會被判社會服務令的馮敬恩，是他最近完成的一幅畫作。他亦打算將畫作送給各個當事人。
游樂現職自由繪畫及設計師，十多歲時已愛上繪畫。他的作品種類多元，水彩、水墨、似顏繪等都是他的拿手作。他鍾情水墨畫，左手手臂上有一大片書法字體的紋身。除了醉心繪畫，他不時留意有關社會運動的新聞，2006年社民連成立時，是他首次感到香港出現新希望，有出席當時的造勢大會。
游樂說話時，聲音很小，回答問題的速度也不快，予人感覺斯文。不過，在政治上，他並不贊同「斯文」，2011年社民連梁國雄衝擊替補機制論壇時，他也有份在外圍聲援，「我覺得衝擊係一個姿態，反威權、反政府嘅一個姿態，覺得民主黨嗰啲太peace。」
游樂是網上電台「人民電台」忠實聽眾，「嗰陣網上電台對我影響較深，聽蕭若元、黃毓民開咪。嗰排蘊釀佔中，一直跟開網台，個個星期都講。好得意，人民力量覺得佔中一定唔會發生，但最後又startup咗。」佔領運動在2014年9月爆發，但游樂當時已經離開香港。有個建築學位、原本做室內設計的他，2014年獲批工作假期，8月辭職飛往澳洲珀斯，與傘運擦身而過。
眼見87枚催淚彈在金鐘傷盡港人之心，游樂決定，與其他身處珀斯、同住一間房屋的香港人，在當地宣傳雨傘運動，「覺得澳洲華人唔知發生咩事，澳洲好多華人免費報紙，除咗《大紀元》，全部清一色係紅底。報紙描寫係『暴動』，根本上係文匯、大公嘅copy。我哋覺得有需要反映事實，究竟香港發生咩事。」於是，他們4、5個香港人聯手，有人負責寫文，有人負責印刷，游樂負責設計及排版，將傘運的因由、香港人爭取真普選的願望寫在傳單上。幾日後，他們開始駕車，在珀斯四處遊走，又特意到各間大學及大使館派發傳單，希望更多人留意傘運。
在澳洲宣傳傘運，支持與鼓勵的聲音往往來自金髮藍眼的澳洲人。相反，居於當地的華人，尤其年長一輩，對傘運卻頗為反感，「有啲華人說：『你走啊，唔好係到搞事。』好難同佢哋再傾，第一句已經話你漢奸、搞亂檔，咁唔同佢糾纏啦。都好和平嘅，只係指住你鬧。」、「不過都有華人支持，譬如我哋呢代過咗去，根本冇個sense，唔知共產黨做緊乜嘢、唔知雨傘運動究竟係咩。聽完我講會有新睇法，想了解多啲。」
派發傳單的行動維持2、3日，游樂將剩餘的傳單擺放在自己的繪畫攤檔檔口，在開檔繪畫的同時，希望有人能拾起單張，了解更多雨傘運動的事。
游樂記得，立即放棄工作假期、返回香港參與佔領運動的想法，曾多次在他腦海中出現，不過最終沒有成事，「以前示威遊行，通常唱首歌就完，今次估唔到咁耐，本身expect最多last一個月。哇，點知越嚟越耐。」、「當時好似人哋買大細咁，覺得應該都差唔多完，但係一直都仲work緊。」、「而且嗰時洗晒啲錢，冇乜錢買機票，有顧慮。啱啱開始（工作假期），走又好奇怪。」直至雨傘運動結束，游樂都未能參與其中，「冇參與，感到遺憾，香港近10年最大件事，冇經歷到，好後悔自己冇返嚟。」
結束工作假期後，他返回香港，政治氣氛已經變得不一樣，「見到議員被DQ嗰吓，係想將電視機都打爆佢，民選㗎嘛，咁都可以褫奪議席。DQ梁游已經好嬲，後尾直頭不知所謂，政府冇得救。」直到雙學三子被判刑，游樂的情緒跌入谷底，對於香港，他坦言「好灰」，「我覺得冇乜希望，唔正面，絕對唔正面。雨傘咁樣都當你冇到，就算你再搞一場再大（規模的抗爭），都冇用，拉晒你哋入去。」
不過，口裡說灰的游樂，依舊參與大大小小的遊行集會，繼續透過繪畫，記錄社會運動中的一點一滴。最近聲援入獄抗爭者的遊行中，游樂亦有到場參與，並畫下示威人士的身影，「我未解釋到點解會繼續去。咁，灰都要做嘅。」、「我都係畫畫啫，相對成本唔係咁大，自己又鍾意，都希望出分力。」
目前，游樂正專心記錄將被逼遷的橫洲三村村民，畫下他們在橫洲生活的日子，他也打算以油畫方式，為928催淚彈一幕留下紀錄。「我覺得藝術係會幫到運動，雖然可能未必好多。藝術係可以改變到社會，一個社會人文究竟有冇美感，藝術係好緊要。有冇藝術，同修養都有關係，人嘅品格亦能夠因而改變。」
「我覺得香港未來真係唔樂觀㗎，不過都盡力去做啦。」
