話說數月前在台北送舊迎新，李月華說《眾新聞》平台準備開波，問有乜marketing好搞？在座各人結論是眾新聞此名太平淡，要爆D。(下刪半小時約三千字廢話。) 總之Brainstorm結果是用「撐硬」 ，因為做這個公益媒體的原始精神就是撐香港，要撐香港一定要夠硬淨。
在場最興奮者莫如香港狗仔之父葉一堅，橫掂都係不如再去盡D，叫「撐久硬淨」，保證一炮而紅。佢老人家一向作風就是堅持到底，於是全場(俾佢焗住)一致決定把《眾新聞》取名「撐硬」或「撐久硬淨」，可惜在場除李月華外沒有一個是《眾新聞》股東或董事，李月華更是一再婉拒，理由大意是你叫你叫班發起人點樣用個咁騎呢既名做新聞？！！？！！？！！
時間返番黎2017，尋晚突然收到李月華whatsapp叫我開專欄，當時明明是我飲醉，點解係佢神智不清？我老sales一個，開口句句得罪人，愛錢如命，一分鐘幾廿萬上落，叫我公益寫文有冇搞錯？不過江湖人出嚟行一句話牙齒當金使(此字廣東話可讀洗)，鬼叫我講過 「李月華，我撐硬。」
而為咗驗證葉一堅話叫「撐久硬淨」必定紅爆，冇發生過的事無法證明，反正此名無人敢用，唔好浪費左D腦汁和創意，我就取此為筆名，遲D可能在facebook開埋粉絲團，有一日我紅到爆，就證明堅哥你是對的，他朝我高價將個筆名賣返俾《眾新聞》，分你一半。(如果當年曹仁超願意賣返個名俾信報，就冇咁多是非啦。幾十年同袍戰友，臨老翻臉，何等遺憾。)
至於撐硬還有甚麼含意，請看下一集。今時今日的網路貼文，最好少於二百字，再配五至七張圖，在手機上滑瀏。此文已經過長，仲要冇圖，大家睇得完最後一句已經是俾面了。
多謝俾面。請也。
