南區區議員區諾軒，9月20日宣布退出加入了7年多的民主黨。
他不是7年之癢，而是7年來都心癢癢。
區諾軒加入民主黨的故事，好似一個男人，同一個自己唔係好鍾意嘅女人結婚。
他其實一早知道，這個女人不是他的最愛。
「在民主黨的日子，一直都有很多掙扎。」
走、唔走；走、唔走；走、唔走......7年來，反反覆覆。
今年8月，他心裡突然變得踏實，只有一個字：走。
義無反顧。
因為，他相信，前路會遇上「最愛」。
區諾軒是南區利東選區區議員，有網民叫他做金教練（指他貌似港足教練金判坤），也有一些人叫他「左膠」。他2011年首次當選，上屆2015年區選做了南區票王得3068票。
30歲的區諾軒是家中獨子，小時住九龍灣，父母開時裝零售公司。他中學讀觀塘聖若瑟英文中學，會考16分，為了入讀中文大學，他在中六時重考會考，得21分。高考成績ABBCD， A中文、B通識、B西史、C中史、D英文，成功入讀中大政治與行政學系，「我沒先天才華，但我係努力型。」
入了中大，他做過學生會內務秘書，那是劉遵義做校長的年代。之後他和同學搞了一個「劉遵義施政監察」組織，「在校園掛了一張紅底白簡體字橫額『熱烈祝賀劉遵義同志榮任全國政協委員』，玩吓。」比起今天校園出現的「香港獨立」，當年真係濕濕碎。
未畢業，區諾軒已想做區議員，「我去日本做交換生，見到當地議會可以做好多嘢，燈柱啦、渠蓋設計啦，都可以由社區決定，居民有得話事。」
「我最初接觸的政黨是公民黨，2007年我讀大學二年級，幫公民黨大律師王偉明在觀塘麗晶區助選，是我初次接觸選舉政治，那是個很快樂的年代。當年公民黨俾我哋年輕人很多嘗試空間，令我對選舉有興趣，可惜王偉明最後輸了。」
「2008年我再幫公民黨梁家傑選立法會，麻麻哋愉快，我記得我講咗好多問題出來，有人話：『超，又唔係你去選，你有乜資格講。』最後我打咗一個5000字電郵講個選舉有乜問題，仲要cc埋關信基，之後我無再幫公民黨。」
「泛民喺2007年區選輸得好慘，當時有一篇文〈區選無間道〉，講建制派點喺地區做嘢，睇完都幾絕望。但我覺得民主係可以由地區做起，我覺得區議會可以做得更好，唔係好狹窄嘅爭取汽水機思維。我想證明俾人睇，民主派在地區係有路行。」
畢業前一年，區諾軒2009年開始諗參選區議會。家住將軍澳的他，有感當時民主派已有不少人在該區駐紮，他正迷惘在哪兒落腳之際，認識了民主黨羅健熙。羅健熙2007年首次參選南區利東但落敗，決定2011年再出撃，「羅健熙同我講：『你沒區落，同我一齊去南區啦。』利東有兩席，佢咁講，我就入咗民主黨。」
「要實現地區民主路，當時只得三個政團做到：民主黨、民協、街工。民協、街工？我唔識入面的人，當時見到民主黨南區幾個年輕人，大家想法相近有合作基礎，直到今日我離開，我對羅健熙、徐遠華、柴文瀚，心存感激。佢哋令我行到一條路，證明地區民主係可以行落去。」
「我在2009年12月加入民主黨，但其實我由頭到尾都好掙扎。我覺得人生嘅恥辱，係我嘅立法會第一票，投咗俾黃成智。那時我覺得佢最邊緣，應投俾佢，但成個學生會嘅氛圍係投俾長毛，做社運係投社民連。喺學校我都唔敢同人講，那個年代如果同人講入咗政黨，好怪、好膠。」
「我有理念上的掙扎，但當年係范國威未離開的年代，因此我起初相信，民主黨可以容納一定程度上的立場分野。」
區諾軒加入民主黨後不久，2010年5月24日，民主黨因為政改方案入了中聯辦。「民主黨內有20多個黨員去信中委會，提出唔使急於投政改贊成票，要求有更長時間做諮詢，我係其中一個有份聯署的黨員，還有尹兆堅等人。」
「當時對我係好大衝擊，我的同輩搞五區公投，民主黨卻不積極參與。我個心好掙扎，我因為想行地區的路加入民主黨，如果我無入黨，就會去做大專五區公投。入咗民主黨後發現愈來愈脫離我嘅想像，儘管我到今日仍覺得，民主黨入中聯辦，唔係乜嘢民主退步、唔算得上行差踏錯，係打橫行一步啦，但係那時我會覺得，同我一直身處的政治光譜、同我很多戰友有好大分野，係好唔開心。以往一同作戰的，好似同我企係兩個立場。」
「以前同一陣營的人會話：你仲係咪支持梁國雄，我話當然支持啦；咁佢就問：但長毛話司徒華（民主黨靈魂人物）癌上腦啊。」
「以前的戰友，日日都鬧民主黨出賣香港。」
「我個掙扎位係：我要證明地區民主可行，我要選到區議會。雖然大政治位同自己有衝突，最後我決定留係民主黨，因為如果我離開，會行唔到我嘅目標。」
2011年，區諾軒和羅健熙在南區利東一、二兩個選區當選，年輕力量為民主黨帶來生氣。民主黨3個南區區議員區諾軒、羅健熙、柴文瀚，被稱為黨內「區羅柴」集團。2012年，區諾軒做了民主黨的中常委，負責黨內政策及社會行動，「做到這個位，先係我最大的氣餒點。」
「那個年代講機場第三條跑道，我反對興建，但民主黨不是這個立場；講領匯議題，民主黨很有潛質做啊，但無搞。我主張加富人稅、反對出售公屋因當中涉及很多管理問題，但無人理我。」
「朱凱迪話我哋係『民主發展派』，支持民主啊，但基建發展就附和政府。」
「我曾經公開講過，如果民主黨通過三跑，我會退黨。之後有些黨員鬧我，叫我唔好成日將嗰樣嘢同退黨拉埋嚟講。」
「講社運，我唔係唔想帶大家做，而係大家無心做。民主黨內部覺得要同主流社運保持距離，例如不會跟反三跑的人合作，但當年我的主要角色，是將外面社會運動的情形，帶返去同民主黨講，希望黨員參與。」
「講政改，民陣說『公民提名必不可少』，我代表民主黨去開會，我要跟民陣說民主黨的角度是三軌方案。這個有掙扎，但我甘於咁做，因我選了在民主黨內部做影響，也是我留在民主黨的角色。」區諾軒當時的立場是什麼？「我係無所謂，必不可少咪必不可少，你講到尾兩樣都爭唔到，都未同人傾。現實政治係，那個moment人哋睬你都有味啦，由頭到尾政府都無睬你。」
「係意識形態問題，自從2010年後，民主黨比較接納一種make deal的交易文化（入完中聯辦之後？）係，想透過呢種方法，攞到一啲嘢，唔係依靠人民嘅力量，我覺得呢個位好弊。（包括同政府make deal？）係。（具體例子是什麼？）......」
「2014年七一之前有預演佔中，民主黨說無論如何都不會去，覺得呢樣嘢好差、破壞秩序。我同許智峰開了個記招，話我哋會去預演佔中，被人鬧得好犀利，話點解我哋飛起個黨。我心諗，你班友唔做，我哋就自己去，我哋兩個做，違反你民主黨乜嘢。最搞笑係，何俊仁最後有來，我覺得佢同李永達兩個比較明白社運的重要性。」
「民主黨唔應該同社運保持太大距離，我深信何俊仁係認同，但黨內的人唔覺得重要，以為落區舉吓牌就可以交數，嗰啲唔係真正嘅社運。」
「我成日想證明，我加入民主黨，但我沒背棄初衷。我退黨篇文配的那張相，係黃之鋒影，當時佢未做反國教，但好關心時事，走來我哋辦事處觀選、影我的橫額，佢當時14歲。後來佢搞反國教走來問我哋借物資。」
「我認識黃浩銘，又係那些年大家一齊衝馬路、一齊留守。」
「我覺得喺嗰啲地方，我先搵番自己。」
「練乙錚叫我留在民主黨影響入面的人，其實，我由2012年一直做緊。」
「恨鐵不成鋼，我有努力過，但唔成功。」
2014年雨傘運動那段日子，區諾軒說，掙扎反而相對少，「民主黨在背後做咗好多工作，例如金鐘秩序、帳篷管理、人脈溝通等，反而我替民主黨唔抵，工作沒被人認同。」他當時每日都去佔領區，初時在旺角，之後留守金鐘。
「傘運後，我曾經覺得可能係時候走，2016年，當時有一班人聚頭，想搞一個新組織叫『眾志列陣』。有黃之鋒的香港眾志、有周永康岑敖暉本來諗過搞的香港列陣，還有朱凱迪、劉小麗、姚松炎等人。」
「2016年立會選舉前，他們有搵過我，希望傘運後有新力量讓聲音延續。大家有聚頭傾過，他們甚至跟我說，不如你考慮搵夠15個提名去選超級區議會，但我心入面清楚，如果我做了這個決定，或會令鄺俊宇或涂謹申選不到，所以我無咁做，我算係維護咗民主黨和今天自決派的一個平衡。」
「最後眾志列陣沒出現，基於好無聊的理由，因傾標準工時傾唔成，有人要選功能組別，覺得應設在50個鐘，我哋呢啲偏左嘅人頂唔順，因一向講緊44個鐘。大理念相同之下，大家卻因為政策搞唔掂。」
區諾軒之後代表民主黨參選批發及零售界功能組別，作為民主派全面對選功能組別的一部分，「我最後取了三分一票，我唔覺得係票房毒藥。」他當時可有跟民主黨說要去選超區？「對我來講，是否做立法會議員並非最重要，所以我沒提出選超區。」
「當年我沒退黨跟眾志列陣一齊行，很多人都怨我，話點解我唔走同佢哋一起，話咁多張砌圖只欠超區，算啦，我覺得太投機了，我就算退黨，唔希望係因為選乜嘢位，呢個唔係我來的。不過點都好，當年我沒咁做，就變咗我的虧欠，大家無行埋同一條路。」
「我仍然記得眾志列陣，很多謝佢哋當我係自己人，佢哋之後DQ嘅DQ，入獄嘅入獄。我很希望大家能重建一條路出來：2016年大家一度醒覺，香港不能沒有主張社運的政團，對民主派是良性互動。行到今天，我覺得我值得走出來，同佢哋一齊行本來就要行嘅路。」
「東北十三子、雙學三子在8月判監，在那個迫爆遊行之後，我決定退出民主黨。我用咗一個月時間處理黨內的人際關係，9月20日正式宣布。」
「7年來，在民主黨有過很多很多掙扎，但今次走，義無反顧」
「我知道眾志列陣好難再出現番，但我相信當時大家在一起的信任是無形的，大家會願意一路行落去。我希望用2019年區選做目標，但我睇得悲觀，覺得未必再有咁多議席，因2015年是運動後的高潮，到了2019年，唔知香港人係咪仲記得。」
區諾軒說，會「單身」一段時間不加入政黨，他可會參加明年3月的立法會補選？「暫時唔好講補選，講助選先啦。」畢竟未來5個月，還有很多變數。
回望過去7年，區諾軒說：「多謝民主黨，無佢無我當初起點，沒南區的朋友沒有今天的路。」 范國威退黨後對民主黨作了不少批評，「我要跟他做相反的。」
「民主黨的人脈關係，幫了我起步。我嗰區街坊有法律問題，我可以即刻搵人幫手處理。當年涂謹申選超級區議會，我乘勢搞咗個遺囑講座，叫他來講，坐無虛席。我好自豪能幫街坊立了300份遺囑，他們肯將呢個大責任託付俾我。」
他很想多謝甘乃威，「他做立法會議員時，在港島開了7個辦事處，包括南區的，他放了很多資源在地區，我見唔到有其他人做得到。」
「我走之前見過何俊仁，問他如何做一個有道義的人，他是黨內一個重要的道義指標。」
「以前我藐單仲偕，因為經濟立場，後來我同佢對話多咗，我哋『區羅柴』最後沒參選立會，我知道佢好在意。」
「卿姐，我本來臨走想約她食餐飯，最後約唔成，佢話唔得閒，但我真的要走了。之後有次再見她，她說好彩無食嗰餐飯，我同佢無乜點客氣。」
「『片』得我最勁嘅係基層黨員，話對我好失望。」
「黨入面無乜人挽留我，佢哋對我走都唔surprise，有人問：『其實都唔同咗立場咁耐啦，點解要呢個時候走？」
「因為呢個時候，應該有更大的理念。」
