【撰文：鄧永謙】
作者為新福事工協會關懷貧窮學校事工主任
前幾晚去到大角咀某個垃圾回收站，原來為了處理深夜時垃圾堆放在閘口的環境衛生問題，個多月前已變成為全日24小時開放。與清潔工友傾偈期間，有位做承接附近食肆商鋪清潔工作嘅街坊剛好把成車垃圾推入站內，並加入一齊吹水。雖然係吹水，但係呢位街坊嘅話題由最低工資、外判制度、垃圾徵費、舊區重建到城市規劃等有關嘅政策都涉及到。
街坊話政府把清潔工推行外判制，變相令工資被迫下壓，最終市場只有一班冇議價能力的老弱傷殘者去做；但特別對於當中嘅老友記，反而唔係應該享有更多長者嘅福利保障，在家安享晚年。至於垃圾徵費，假如政府只推行如膠袋徵費嘅模式，並無大力增加資源去做嚴格監察及公眾教育，最終亦只會弄巧成拙，令前線清潔嘅工友承受更大的工作負擔和壓力。
而對於舊區重建，街坊本身在大角咀有一個自住的唐樓單位，一家四口有四百多平方呎的空間。但始終已數十年樓齡，單位內已甚為殘破，雨天時牆身亦有滲水情況。雖然心內也希望巿建局對自已層樓有收購重建的可能，不過亦明白根本無可能再在原區居住。「拎住嗰最先收到嘅四成五成賠償，根本冇可能買到樓，就算之後收埋尾數（餘下嘅兩三成），都買唔起依家嗰棺材豪宅啦！點解市建局唔考慮同區起新樓同業主樓換樓呢？點解依家市區拆咗樓嘅地，只會益地產商起新樓，唔會用嚟起公屋呢？呢啲唔係利益輸送，咁仲叫乜嘢？」
見眼前這位街坊原來識咁多嘢，即刻想邀請佢做我哋嘅「社區老師」 。
問街坊如果有機會，有冇興趣同學生分享吓佢嘅人生閱歷？對方就話自己係個老粗，冇乜文化嘅下等人，點會有學生聽佢講嘢......
而同場嘅幾位大學生，即時回應街坊：
「我哋就係學生喇，仲要係大學生，你頭先所講嘅嘢真係超正！」
街坊跟住問：
「咁你哋讀緊乜嘢科？」
「社工系。」
「咁就啱喇！你哋要多啲落嚟同班街坊傾吓偈，了解吓民生，唔好學班高官咁，只坐係冷氣房度，不知民間疾苦......」
最後，街坊俾咗佢聯絡電話我，仲講笑話如果唔介意佢有機會可能爆粗，都樂意同學生哥分享吓社區嘅所見所聞，人生智慧。所以成日都話，社區先至係課室，街坊才是我們的老師。
