前保安局局長、行政會議及新民黨立法會議員葉劉淑儀，昨日稱被上市公司領展「派人恐嚇」，指專欄作家李兆富透過新民黨政策總裁袁彌昌，要求她不要再批評領展，否則領展對新民黨區議員不利。
葉劉淑儀昨日向眾新聞透露，李兆富傳話之後，領展曾經透過立法會議員、鄉議局主席劉業強聯絡她。她稱：「劉業強同我講：『（領展行政總裁）王國龍話，啲公關唔識嘢，得罪你，唔好意思，不如我哋約埋三個人食餐飯啦，我安排喇。』」
記者今日向劉業強求證，他卻有不同說法。劉業強憶述邀約葉劉淑儀吃飯的經過指：「上星期唔記得二、三，我見到葉太，啲人啱啱走晒，應該星期三啦，星期二冇理由Chamber有meeting。我講開我約咗邊個（王國龍）食飯，好耐冇同佢食飯，我識佢好多年啦嘛，40幾年。我約咗佢（王國龍）食飯，不如（葉劉淑儀）一齊啦，咁啫嘛。我唔知中間佢哋有咩關係。」被問是否王國龍請他約葉劉，劉業強答：「可能佢（葉劉）有啲誤會。」
那麼劉業強可有向葉劉淑儀提及過租務的事？「冇呀。我都知大家對領展有啲意見，我都有反映意見俾佢（王國龍）聽，我話好多人對領展有啲意見，領展係上市公司，梗係為股東利益啦，佢都唔係完全冇回饋社會，我相信都有嘅。」他又可有向葉劉淑儀提及領展的公關做得不好？「佢（葉劉）有講過佢（王國龍）唔見佢，點解搵啲咁嘅級數員工、公關嚟見。咁我話咁啱食飯咪一齊傾吓偈囉。」
王國龍又有否向劉業強提過葉劉淑儀的事？「冇。中間發生咩事，我真係唔知，咩姓李呀姓袁呀，我真係唔知。」如果不是王國龍的意思，劉業強為何約葉劉吃飯？劉業強指：「冇冇冇，我都完全冇同佢（王國龍）通過電話，上次見佢可能都成年。」該頓飯是否打算由王國龍請？他再否認：「冇，我請啫嘛，我話一齊食飯，請便飯啫嘛其實。」
對於劉業強今天的說法，葉劉淑儀回應說：「我當時聽到就係話王國龍想同我食飯，話啲公關唔識嘢啫，我哋三個人食餐飯啦咁，我聽到係咁，邊個誤會就唔好理啦。而家事發喇，梗係好多種講法都有。我嘅印象就係咁，（王國龍）想請我食餐飯擺平我，就叫劉業強嚟約囉。」
