立法會通過修改《議事規則》那天，大難臨頭之時，民主派召集人莫乃光聲稱「冇輸」，揚言他日會「百倍奉還」。還有泛民議員聲稱，因為不想得失4成溫和選民，故沒有採取較激進的抗爭手法。部分民主派繼續「自我感覺良好」，卻被一些網民批評與民意脫節、無心戀戰、行動僅圍爐取暖，甚至只是「呃like」、「做騷」。
朱凱廸，難道都是這樣？抑或他是當中的異數，卻有口難言？
他在近月的拉布戰中，先後引用《議事規則》第54（4）條及第88（1）條，動議不將法案交付內務委員會處理，以及驅逐公眾人士及新聞界離場議案。其後又曾衝上主席台、用鐵鏈將自已綁在坐椅。
作為議會內「激進」代表的朱凱廸，如何看待同坐一條船的民主大黨派議員？ 去年他以獨立身分憑84,121票膺新界西票王，帶著大批選民的期望走入議會。他這個慣於街頭抗爭的人，在立法會的新秩序之下，如何自處？
朱凱廸民間抗爭者的形象向來鮮明，由11年前的守護天星皇后碼頭、8年前的菜園村「不遷不拆」、去年爬上西九高鐵站地盤的天秤，掛起「停建高鐵」及「反一地兩檢」直幡。他也參加過2011年及2015年兩屆區議會選舉。其中在2015年參選期間，朱凱廸在facebook貼出一張10多年前他在阿富汗山區採訪時拍下的照片（下圖），照片附有一段文字說明：「在新界鄉村提到『反高鐵那個朱凱廸』，不少人就只想到『搞搞震』三個字，雖然當年反高鐵的理據一一應驗，更加成為市民共識。當社會烏煙瘴氣時，『搞搞震』有時實屬必要」。
朱凱廸落選區議會，但在2016年的立法會選舉，他以84,121票膺新西票王，成功走入議會「搞搞震」，公眾記得他那一句：「反對官商鄉黑」。
他甫入議會，新任立法會主席梁君彥在申請放棄英國國籍的手續問題引起爭議。當時朱凱廸飛往英國調查，雖然最後沒有引爆驚天動地的新聞，但做過記者的朱凱迪，很明白什麼是政治。
近幾個月的《議事規則》拉布戰，朱凱廸仍是議會內最搶眼的一個。
不過，自從跟他同聲同氣的羅冠聰、姚松炎、劉小麗、梁國雄被DQ後，朱凱廸在民主陣營中，顯得有點兒孤單。
記者問朱凱迪，目前在議會抗爭，是否還不如昔日在民間抗爭？朱凱廸不認同：「我之前可以做我之前做嘅嘢，唔係因為我喺（議會）出面。如果我而家喺出面、唔係做議員，我都做唔到我10年前做嘅嘢，要有太多條件配合。你喺唔同時候、唔同位置，做唔同角色，咁所以冇得去比較。我覺得我而家可以喺民主派作嘅貢獻，係我呢個年紀、呢個歷練嘅人，喺民主運動裡面最好嘅崗位。而我覺得呢個崗位都應該有其他同事認同嘅。」
說回《議事規則》一戰後，有泛民中人聲稱，泛民支持者以溫和為主，故抗爭手法不能過激，更反問「為了15%激進派，失去四成溫和支持者，又是否值得呢？」朱凱迪對此有何看法？
「大家都調整緊㗎喇，有時會講多咗一兩句呢啲無謂嘅說話。之所以係『無謂嘅說話』，就係話我哋整體嚟講係面對緊個新形勢。」朱凱廸所指的「新形勢」，是參選確認書風波、DQ事件、13+3、修訂《議事規則》，還有一地兩檢、國歌法立法，以至23條立法，「而呢一連串部署，其中係一個北京好想有嘅主軸，係透過林鄭月娥去分化民主派。」
朱凱廸認為，部分人其實尚未了解正面對的「新形勢」，而在如此形勢之下，再去斟酌「溫和／激進」、「40%／15%」，正中下懷，「拗呢個好似我哋真係有兩類人截然不同咁，事實上我哋要做嘅就係要restructure成件事個講法。」
朱凱廸說，那些40%、55%的劃線不會影響到他，「呢個數字本身都係講緊話你覺得啲人諗乜、個poll講乜，跟住就轉吖嘛。嗰個係幾奇怪，民主運動係冇可能跟呢個方法，因為我哋遲早會面對一個局面，就係可能百分之50以上嘅人係唔想要民主、想投降，咁你民主派係咪就唔要（民主）呢？你唔可能係咁㗎嘛。」
朱凱廸更不點名指，部分民主派議員不介意做「一個大花樽」，他其後修正說法表示，有些議員較狹義地理解他們在議會內的職能、「冇咁創造力咁去諗吓個立法會可以係點樣」。
「我覺得而家真正嘅問題係咩呢？而家中共俾民主派嘅position，你當《基本法》係真嘅，《基本法》第73條（有關立法會行使的職權）裡面，字眼上面可以向兩個方向走，舉個例，佢話你可以批准、監察財政撥款。（批准、監察）呢兩個字，你按照而家議席分布或選舉制度，你可以好戇居咁理解，都係建制派大晒，佢投票、佢鍾意批准咪批准囉。監察都係，監察可能低到我哋問佢嘢、佢要答你，呢個係好窄嘅理解，或者一個最戇居嘅理解係你只能口頭問。你存在嘅啫，不過你嘅存在係一個花樽、一個大花樽……我覺得有啲同事都係咁樣，即係民主派裡面，佢唔介意做一個大花樽。」
朱凱廸隨即修正「大花樽」的講法，指可能部分同僚是「比較狹義去理解」那些字眼，或者「冇咁創造力咁去諗吓個立法會可以係點樣」。「我覺得我哋應該去重視多啲，我哋作為地區直選過半嘅陣營，到底喺而家嘅格局裡面，我哋同行政當局個關係可以去到幾盡？盡嘅意思就話，我有民意，你有權力，我哋咪角力囉。我哋個角力而家被視為拉布、被視為負面嘅嘢，令到行政當局做唔到嘢。我哋整體嘅任務就係我哋要克服呢種講法。」
朱凱廸認為，過往大家未有認真地思考過這個問題，因為一直心存希望，以為中共會給香港人民主，因此處於一個「FF嘅狀態」（FF一詞來自電腦遊戲《Final Fantasy》的名字簡寫，取其「最終幻想」的意思）。然而事實上，形勢早已逆轉。
「呢個FF唔會有㗎啦嘛。特首又係你、建制派又贏埋立法會過半，呢個係最誇張嘅處境。到而家北京反過嚟俾另一個答案你，我不單止唔俾你普選，仲要喺立法會令到你哋班人係完全冇能力牽制我，接住令所有人都對呢個制度失望，啲人咪唔投票選民主派囉……佢咪total control囉，呢個係另一個extreme版本。」
朱凱迪續指，民主派要在這個問題上重新建立一個清晰的想法，繼而制定共同策略去應對。「個起點就係我哋作為政治代表，我哋自己都喺呢方面，唔好再留戀過去嗰種處境。」
朱凱廸去年參加立法會選舉時，曾經點名批評民主黨：「你見到民主黨而家嘅口號仲係『有事要搵民主黨』，都唔關民主運動事。」
被問到他與其他民主派議員的關係，今天的朱凱廸這樣回答：「關鍵係我哋唔係搵我哋嘅分歧，或者我哋唔同嘅地方，而係搵我哋共同嘅地方。呢個係同黃毓民時代最大嘅分別。而家睇到有啲評論，好似捉一啲有咩分別嘅地方，譬如任建峰、蔡子強，好似要提出，你有啲人好激進，搞到成個民主派都俾你累死咗呀咁樣。呢啲係好過時嘅講法。」
隱隱晦晦說出口的批評點到即止，無論記者詢問多少次，朱凱廸都不會說「同事」的不是。「我從來對於民主派嘅同事，唔會公開批評佢哋，呢個係好重要嘅基礎。」、 「我唔係黃毓民，我唔會去鬧人。但係我嘅任務係，我要將我認為而家2017年嘅民主派應該點樣去團結、團結喺咩基礎之上，我有我嘅睇法，我希望將呢個睇法影響到其他同事，呢個先係重點。」
朱凱廸解釋，泛民過往有一段時間依靠分裂來產生政治能量，例如新同盟出來罵民主黨、社民連出來罵泛民，再有本土派出來罵全部人。「（過去）有啲路徑依賴，啫係話長毛、毓民、慢必、大舊，呢4條友一路過嚟就係特立獨行，不怕孤立才可獨立，咁嘅一個trend。所以2016年9月一開局嘅時候，其實所有人都用呢個嚟理解我……但可能而家唔係用呢個方式去產生政治能量。調返轉頭，我哋要有個整合嘅能力去產生政治能量。」
至於他如何去拉動甚至團結其他民主派議員，朱凱廸答道：「唔係拉，呢個係我嘅政治諗法，點樣發展到、令到更多民主派嘅同事理解，其實唔係一個個人被說服嘅關係，因為所有人都係民主派呢邊嘅人，全部都係民意嘅代表，所以都係好互動嘅過程。其實我要說服街嗰啲人。」
朱凱廸為同事說好話，指自10月開始，整個民主派在議會工作的結合「緊密個程度高到我自己都唔相信」，「我覺得佢哋（溫和民主派）已經配合到加零一，基本上佢哋唔係昨日嘅佢哋。」
「有啲嘢係我哋先會感受到，譬如黃碧雲都點人數、黃碧雲都多番提出：我同你死過，喺能源標籤（議案）裡面，佢講關於全球暖化，如果你聽返佢段發言，會笑到爆炸，好騎呢嘅發言佢都盡力去做。有主要關於文鬥部分，係功能組別同埋民主黨議員辦事處嘅同事去精心研究嘅結果，嗰個就係外面未必睇到好多，但我哋會感受到溫暖。」
不過，朱凱廸早前兵行險著引用《議事規則》第88（1）條，事後卻未見有很多隊友挺身支持他。他坦言，做法是「攞條命出嚟搏」，「點解我會擔當嗰個角色，係我覺得我可以孭到呢樣嘢，跟住我出嚟講話呢個係collective嘅決定，我覺得咁講，起碼有耳仔聽嘅人都知道呢件事係一齊決定㗎啦，或者我都叫做擺咗所有人上枱。諗返轉頭，我可以做呢樣嘢，正正係相對於其他人，衡量過之後搞唔掂，孭唔起呢單嘢，佢咪會有佢孭唔起呢個判斷底下嘅因應，而我覺得大家喺因應嘅時候，已經好愛護我、好保護我喇喎。」
「我呢類人想做嘅嘢，其他同事係愛莫能助，冇辦法自己做，但佢唔會阻止我做，或者企出嚟去批評，咁你唔覺得已經係前所未有嘅一個狀態咩？愛莫能助係因為佢唔係咁嘅人，譬如8點57分我想跳上主席台，我覺得除咗慢必（陳志全）同我之外，可能冇第二個人physically跳到，另外就係想唔想跳，或者佢覺得跳有冇用。」
立法會最終通過建制派提出修改《議事規則》，泛民議員被質疑未盡全力。朱凱廸回應指，要拖延下去的話，則要在會議中途做到一些事，令會議不正常停頓，惟停頓的長短並非議員可以控制，「譬如正常嚟講，佢 （立法會保安）唔會有把剪去剪個鐵鏈，我個鐵鏈可能已經搞幾粒鐘，可能休咗會喇喎。但佢嗰日準備好充足，所以佢可以喺5分鐘去處理佢之前要用兩個鐘處理嘅嘢。呢個如果你冇計過條數，你會覺得盡唔盡力嗰啲嘢，唔係好公道。個盡力係講緊9月份開始喇喎，我望任何一個人（泛民議員）喺呢件事上面，我唔會有呢種感覺。」
輸了一場《議事規則》拉布戰之後，民主派未來還可以點走下去？「我覺得正正係paradigm shift（範式轉移）或者轉折所在，可能我哋都要面對呢個現實，到2020年嘅時候，我哋唔係九流十家咁樣去選，而係gel埋一齊、一個陣營走去選……當你俾人打到殘、得22席時，你如何作為一舊嘢，去形成同體制有張力嘅關係，佢會感覺到你嘅存在，唔係當你冇到嘅。唯有係你證明到你自己嘅存在，係一個整體嘅存在，你嘅政治能量就係吸俾成個政治陣營。」
「而家真係要paradigm shift，由我哋先去帶出嚟嘅，就係我哋converging（聚集）嘅。」朱凱廸指，泛民要有整合，此後亦要令支持者明白，但目前共同的問題，是群眾政治熱情的表達方式有所轉變，除了非常獨特的情況，支持者不會出來遊行示威，故泛民要產生新的政治熱情及政治能量的動力，「我覺得答案係一齊去搵。」
