眾新聞 Logo
眾新聞 CitizenNews
眾聞

2018守護香港的10個理由


 

2018年1月1日,民間人權陣線舉辦「守護香港」元旦大遊行,大會稱有1萬人參加,警方指最高峰時約有6200人。選擇在新年由銅鑼灣遊行至政府總部的人,踏着堅定腳步,希望堅守核心價值、香港不要繼續沉淪。

上街的人,行出來都有理由、都有心願。他們,都是香港人。

黃國才

黃國才(47歲)

我要守護:要守護嘅事實在太多,但最近會比較緊張一地兩檢,聽中央最近嘅發言,例如李飛嘅「一言九鼎」論,我覺得實在太唔講道理,覺得好多曾經被承諾嘅法治、一國兩制,都逐步崩壞。我昨晚倒數完返到屋企好夜,今朝都好攰,但都迫自己用15分鐘整好道具「割地賣港可恥」出嚟遊行。

我想香港:維持原有嘅優質文化,例如對法律嘅尊重、行使遊行集會嘅自由。我是藝術工作者,過往習近平訪港、七一遊行,我都會透過行為藝術、用雕塑等抗議,將藝術融入政治,希望繼續好graceful咁作出反抗。

我曾經同朋友講「我去遊行,你嚟唔嚟。」佢答我:「如果贏就嚟,唔贏就唔嚟。」我覺得佢唔明咩叫堅持同希望,同中共打仗係要堅持好耐,唔係幾年就可以做到,可能到下一代都繼續打緊,睇下唔同歷史事件就會知。所以我而家仍然有希望,亦期望越來越多香港人會覺醒,並更理性咁部署反抗。

陳小姐

陳小姐(23歲)

我要守護:香港人享有嘅自由同法治。我平時唔太了解政局,亦唔算好熱衷政治,但都見到香港越來越荒謬,好多嘢都好匪夷所思,例如修改《議事規則》,以前覺得會有商有量,但原來一投票就通過晒,原來以前當成笑話睇嘅嘢,今日已經發生咗。其實我係咁啱搭電車過嚟先知道有遊行,亦有掙扎過係咪要參加,但最後覺得,如果我仲可以行到出嚟,就要嘗試下去做。

我想香港:搵返力量。好多年輕人傘後都採取好消極嘅態度,覺得咩都幫唔到,我本身都以為大家已經唔care、無力感好強,我而家讀緊醫科都會覺得,自己將來只係一粒齒輪。不過,我都係走出嚟先知道,原來大家仲好關心呢個地方,從中搵番一股力量。我希望中央會見到,有班人係唔會咁容易認輸,你想贏都唔係咁容易。

區晞旻

區晞旻(32歲)

我要守護:家園免受粗暴規劃。我係馬屎埔嘅村民,以耕田為生,但政府而家想收咗條村、破壞農地、破壞社區關係,將嗰到變成一個新市鎮。我一直都有參加呢類遊行,希望大家繼續關心東北發展計劃嘅議題,唔想自己屋企因為呢啲粗暴規劃而被破壞。

我想香港:可以讓香港人生活得好啲。其實我希望可以唔使成日都咁嬲,面對無賴嘅政府,我覺得我哋要諗,究竟想要一個點樣嘅香港,之後去做啲嘢達至成功。譬如我好想保住屋企,就喺2010年成立馬寶寶社區農場、去遊行示威,雖然唔知最尾會唔會成功,但如果而家唔做就係零。 

鄧浩鋒

鄧浩鋒(20歲)

我要守護:香港嘅核心價值。作為社工系畢業生,會見到社會有好多不公義嘅事發生,例如綜援加好少。如果喺政治方面,就會見到DQ議員、修改《議事規則》,呢種不公義令到香港人越來越難行。

我想香港:民意被政府接納。政府而家所謂幫市民係用把口講,冇咩實質嘢證明到。希望政府可以聽多啲民意,為市民做多啲,例如全民退保。

退休公務員

退休公務員 (60多歲)

我要守護:法治。如果一個城市冇法治,就會連商業都搞唔好。香港已經變晒,司法、立法、學界,已經被滲透晒,而家完全係殖民方式統治。以學界為例,大學本身係講求獨立思考,但而家講港獨都唔得。

我想香港:對香港其實冇咩期望。我哋嗰代讀好書,好彩就入大學,做天之驕子。唔好彩就自己捱下捱下,爬下爬下,做專業人士,咁都唔會差得去邊,但後生呢一代真係無啖好食,連想結婚生仔都買唔起樓,係一條絕路。但如果而家大家都唔出聲,就真係死梗,因為出咗聲,即使係比較微薄,但起碼可以令政府諗下。

朱小姐 

朱小姐(30多歲)

我要守護:香港嘅核心價值。我喺美國讀書,喺當地搵到工作,已經移咗民,但我仍然當自己係香港人,家人朋友亦依舊喺香港生活。雖然美國嘅華人仲會覺得香港好好,但我每次喺Facebook睇到香港嘅新聞,見到2017年嘅香港發生好多事,都會覺得好絕望。目前遊行係自己唯一可以做嘅嘢,之前暑假返嚟都有參加七一遊行,今次聖誕節返香港後,想帶埋小朋友嚟參加,希望俾佢感受下,知道香港發生緊咩事。

我想香港:唔好咁快變成中國省市嘅一部份。雖然自己已經移咗民,但我仍然好關心香港,希望香港繼續撐到幾耐得幾耐。 

林小姐

林小姐(50多歲)

我要守護:公義。香港發生咗好多唔公義嘅事,例如DQ議員,我當時放工睇到新聞即刻拍枱大鬧,我哋選啲議員出嚟,佢哋犯咗咩大錯?點解要DQ佢哋?當時覺得好無稽,從來都未試過講咁多句粗口、咁大個女未試過一日咒咁多人。經歷完情緒發洩後,作為愛香港嘅市民,我覺得要繼續走出嚟,守護公義同香港,所以我為咗參加遊行,噚晚冇出去倒數,好早就瞓咗。

我想香港:繼續守護公義。作為基督徒,我相信上帝係公平公義,為香港帶嚟恩典。我同時會繼續鼓勵其他失意嘅基督徒,喺大家灰心嘅時候,繼續走出嚟守護公義。

黃同學

黃同學(11歲)

我要守護:唔俾「一地兩檢」係香港實施。我平時放學會經過反對「一地兩檢」嘅街站,知道「一地兩檢」會容許內地公安入嚟香港執法,違反《基本法》,令我覺得好嬲、好唔合理,所以自己想參加遊行反對,叫媽媽帶我嚟參加。參加遊行起碼出過嚟做過嘢,令自己唔會後悔。

我想香港:香港嘅問題由香港警察處理,唔應該由其他機關執法。我希望大個成為立法會議員,可以代表香港人審議法例。

譚加玲

譚如玲(63歲)

我要守護:香港不被共產黨控制。我覺得共產黨好得人驚,喺我哋心臟地帶、九龍搞一地兩檢,如果係咁,你做咩都得啦。我一聽到就好憎林鄭月娥,一見到政府講嘢就好嬲。我喺雨傘運動之前已經開始參加遊行,每一次示威活動我都會嚟,因為好驚有一日再冇機會出聲。

我想香港:政府可以好似太陽光照一樣,溫暖、公正;有錢又照,無錢又照。希望香港地,有嘴巴講嘢嘅官,唔好睜大眼講大話。

Abby

Abby(70後) 

我要守護:一國兩制。其實之前冇參加呢啲活動,以前我唔理政治,覺得啲人好麻煩。不過近期見議員被DQ,我哋選出來嘅人,一句話唔合法就DQ,加上遲啲國歌法,擔心隨時俾人拉,面對呢啲情況好傷心同無奈,連最基本嘅發聲自由都無埋。所以自己之後慢慢醒覺,覺得如果唔行出嚟就會慢慢被滅聲,就連小朋友都會不停被洗腦。所以想帶埋小朋友嚟,俾佢哋有多啲認識。

我想香港:團結。希望香港人可以行出嚟,行得一次得一次,因為將來政府可能用好強硬嘅方法,到時連行出嚟都唔得。 


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe