眾新聞 Logo

眾新聞 CitizenNews
眾說

末代打工仔


講完品牌精神輪到介紹作者,包裝經營團隊有助加強品牌吸引力, 提升股價。

唔需要任何證明,我深信我這一代已經是末代打工仔年代,仲有人爭住請的人才少之又少,五十歲後失業應該可以宣布退休。科技佬早已一再警告,未來是機械人年代,全球都市最少25%的職位可以由機械人代替,職位憑空消失,不用再補。你上網睇下阿里巴巴的物流系統和任何一家最先進的停車場或家居保安系統,你就知道五、六十歲後連點倉執貨和看更都冇得你做。 唔好以為專業就可以食過世,美國一些保險公司已經開始更換大數據演算系統,然後把大量的精算師裁減掉,如果你的專業口袋唔夠電腦深,一樣隨時失業。所以我成日警告我做會計個細佬,你唔快D爬到決策層,就肯定短命過key單嗰個,做會計師不如做廚師穩陣。

曾蔭權當年角逐連任,用「我會做好呢份工」作為競選口號。網路照片

我呢個年代已經是末代,當年煲呔曾連任標語「做好呢份工」 俾人笑到面黃,不過今時今日,能否做好你份工根本唔到你話事,而且市場上根本冇乜好工。好似我呢D咁聰明又咁搏殺的年輕人,下一站如果公司冇D股份俾你傍下身,不如走去創業,開心D,人都健康D,最少不會被操到過勞死。

新的年代係「微創業年代」,網上萬事俱備,就睇你夠唔夠薑。 淘寶一個光棍節做超過一千億人民幣, 網購之熱潮讓很多新一代的電商人才不再逗留在大都會,各自返鄉插支旗,皮費低又自由自在,仲可以繼續食阿媽煮的靚飯,和中學女同學結婚。未來電商全球化卻是以中國為核心, 馬雲上星期走去美國搵狂人,就話可在美國創造一百萬個新工作,原因是美國貨可以賣去中國有三億中產階級的消費市場。 所以今日你係香港插支旗,手上有好嘢,一樣可以坐喺屋企就賺人民幣搵土豪著數, 唔需要有錢到在彌敦道開金舖。 

如果你唔鍾意賣嘢,可以學表演。不知何時出現的網紅經濟,哈,個傻妹唱歌又幾好笑,送支花俾佢就五百蚊,送架Benz四千, 而其實呢D虛擬禮物交易個傻妹拆走四至六成,唔知佢傻定你傻?在台灣,稍有技能例如化妝、煮飯、著衫、旅行者被稱為達人,閒閒地有一、二十萬粉絲follow,寫篇「業配文」 收四萬至八萬台仔,稿費高過查良鏞。全球華人市場, 網路電商和網紅經濟都有人在圍,大陸和台灣已經愈行愈快,你ready 未呢?

再唔係走去揸車,台灣最低工資二萬五 (約六千港仔),尋日我坐車去高鐵站,個後生仔同我講,揸Uber如果你架車唔錯、個人又生得幾靚仔好似佢咁,勤力D四個小時就賺到二萬以上,仲唔洗交稅,周不時載到靚女。我睇佢揸架Toyota三年款但乾淨企理蠟蠟拎,個樣就後生時代嘅黎耀祥咁囉。 

這就是微創業年代的開始, 一個人冇乜錢都可以靠網上的各式各樣龐大系統支撐創業, 而且很容易就可以面向全世界,後生仔唔好埋怨搵唔到工啦,打工等死,拿拿臨想辦法去創業吧!(第四集)


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe