退休警司朱經緯，在2014年佔領運動期間涉在旺角以警棍毆打青年鄭仲恆，被裁定一項襲擊致造成身體傷害罪罪成，今天被判入獄3個月，並獲淮以5萬元保釋等候上訴。鄭仲恆坦言，案件已糾纏他3年，影響他的工作及生活，令他承受不少壓力，內心也有掙扎，希望事件盡快完結。
香港警察隊員佐級協會和香港督察協會均向會員發公開信，表示對裁決感到失望。香港警察隊員佐級協會批評，判刑將對前線警員執法造成極大影響，並嚴重打擊前線警員士氣。香港督察協會則形容，事件對香港和警隊來說是一個悲劇，讚揚朱經緯臨近退休，仍到前線執勤的表現。
法庭上，朱經緯與鄭仲恆再次見面，分別是被告及證人，鄭仲恆當日出庭作供時只有一個想法：「因為嗰一棍、嗰一下，咁就纏繞咗我3年。」因為這一棍，鄭仲恆受到社會關注，他曾出席記者會，要求盡快落案起訴朱經緯。不過，與此同時，他的生活及工作亦受到影響。經歷過往3年的種種，今日朱經緯被判囚3個月。鄭仲恆說，他的心情並無特別愉快，甚至坦言有一絲後悔，「其實本身冇諗住將件事搞到咁大。而家呢一刻諗番起我喺當中失去嘅嘢，其實唔多唔少都有啲後悔。」
為了不辜負其他人對他的期望，鄭仲恆一直堅持「企出嚟」。然而，這3年來堅持法律訴訟，他的內心卻有不少掙扎，這些真實而複雜的情感，未必人人知道，「其實我咁做啱唔啱呢？咩叫啱呢？其實我而家都好含糊。因為我企出嚟，拎返個公義，呢個係道德上需要。見到不公義挺身而出，唔好俾呢件事發生喺另一個人身上，係屬於社會道德。但事實上，會有其他人同你講，你唔好搞咁多嘢啦，如果搵唔到錢咁點呀？失去其他嘢咁點呀？你唔係做政治呢行㗎，你呢個歲數（現年28歲）、呢3年、呢段時間，係應該focus係其他嘢......究竟咩叫正確呢？」
「當然，我企到咁出，係因為企咗出嚟，就要堅持落去。希望證明警察咁樣做嘢係唔啱。」
鄭仲恆2014年支持雨傘運動，當時他做廣告工作，是個普通打工仔，無任何政黨背景。事隔3年，鄭仲恆的樣貌、當日被打的片段，再度獲得社會關注。他坦言，昔日面對的壓力，近期又再次出現，「其實我唔太想當日被打嘅片段重新出現，畢竟都係3年前嘅事啦，而家人都老咗啦，我唔想一件事再係咁重提。有啲人會同我講，哇，你而家好出名啦。咁又點呀？不如你試下俾人打啦，你都可以好出名㗎。我唔鍾意呢個感覺，出名又點啫，呢件嘢唔係好事嚟㗎喎。」
作供期間，鄭仲恆多次遭辯方大律師彭彼得盤問當日到旺角的動機，質疑他的誠信。鄭仲恆憶述，當日出庭時的確非常氣憤，「佢係無中生有、問題又重復，講一啲完全唔係事實嘅嘢，又將啲嘢誇大。我當時擰一擰轉頭，（辯方大律師）就覺得我有動機。同埋問嘅問題又模棱兩可。所以我就開始唔耐煩、有情緒。但在我完成作供離開法庭後，有朋友同我講，你唔需要咁勞氣㗎，因為辯方律師係理據好弱咁幫朱sir打走控罪。我就心諗，係喎，其實當辯方律師越誇張講案件嘅細節，就證明佢嘅理據係越薄弱，所以之後嘅情緒比較好。」
對於朱經緯被判囚3個月，鄭仲恆表示，對朱經緯依舊無太大感覺，不評論他申請上訴的決定，對法庭亦抱有信心。他對警方則仍有不滿，「我未見佢哋有任何歉意，或者承認工作上有啲失誤、錯誤。睇埋份公開信（香港警察隊員佐級協會發出的公開信），就睇得出佢哋完全唔知道有問題，咁更加令我覺得，警察係咪一向咁做嘢。公開信又話會影響士氣，係咪代表警察打人就會增加士氣？唔係㗎嘛。」朱經緯獲准保釋等候上訴，他指，未收到法庭傳召他再上庭作供的通知，只希望事件盡快完結。
香港警察隊員佐級協會主席陳祖光向會員發公開信，對法庭的決定表示極度失望，相信判決結果對前線警員執法必會造成極大影響，以及嚴重打擊前線人員士氣。聲明又指，協會會向管理層反映有關合法使用武力的疑慮，希望減輕對執法的不良影響。協會又促請會員依法按程序執行職務，並堅守崗位，努力維持治安。
香港督察協會主席李占安向會員發公開信，指對裁決感到痛心失望，形容事件對香港和警隊來說是一個悲劇，稱執法者因執法引致判刑的痛苦和磨折，實非外人所能道。公開信指，朱經緯與當事人不涉及任何私利轇轕或個人恩怨，又讚揚朱經緯臨近退休，仍當仁不讓，站在最前線、最敏感、最吃力不討好的位置執勤，形容其志向老驥伏櫪，值得成為楷模，協會一定會應朱經緯的意願作全力支持。公開信又指，警隊一直努力維護香港的法律和司法精神，是一支專業和團結的隊伍，服務社會的初心、手足共濟的決心不變。
