眾新聞 Logo

眾新聞 CitizenNews
眾說

食豉油,邊隻好?


天寒地凍,最正梗係去大角咀打邊爐,海鮮肥牛豬骨煲,唔夠喉可以叫多半隻燒鵝送啤酒。

今時今日,唔洗靠旺舖就賺到D錢的小型食肆真係買少見少,能夠捧場請盡量捧場,讓香港地仍保留一角本土風味。

打邊爐生意好,除咗賣牛肉和賣海鮮的供應商外,有人賺得更多你估係邊個?你睇條題就知啦,物豉油囉,一人面前擺一碗,食完倒掉大半碗,你話幾好賺丫。 

事實上豉油根本唔係D乜鬼貴嘢,廣東人以豉油提鮮,所謂吊味,蘸豉油是為了把本來的食材的鮮味更有力地呈現出嚟。 你食嘢係會因為碟豉油好味咗,但重點還是夾入口件餸正,俾舊屎你,蘸最靚嘅豉油你食得落咩?

早輪消委會報告抽驗豉油結果,公布致癌物和含菌數超標者,透視出本地消費者的表面精明實質唔識計較。二千幾百年前韓非子教落,D人犯罪,你要先諗佢犯罪嘅目的想得到嘅利益係乜?嗰D致癌物,主要是要增加人工色素,點解要增加人工色素? 因為廣東人個個自認食家,豉油要色濃才叫純叫正喎,咁物加D焦糖色素你嘆吓囉。點解嗰間乜九醬園含菌量超晒標?因為D現代人相信古法手工釀造純天然丫嘛,於是個傻佬第幾代走去元朗搞二千呎廠房做「天然生曬」。 我撐久硬外號「垃圾肚」,基本上乜都敢吃,但聽到「天然生曬」 四個字就毛管豎起,所謂天然發酵即係鑑生漚到佢發mould,仲要曝露在空氣中「生曬」喎,你諗吓依家D空氣指數PM值幾高先啦?佢含菌量超晒標,證明佢老實架,真係天然架,鍾意天然嗰D粉絲快D去買啦。

固體發酵的古法醬油釀造。網絡照片

講開韓非子呢個漏口仔真係好聰明架,從既得利益者的利益思考,很多事情就更豁然開朗。台灣曾經有過一隻標明古法天然手工釀造的豉油名牌叫做豆油伯,賣一般豉油二、三倍價錢,因為被一班所謂網路達人天然食品愛護者追捧,最後賣到遍布台灣各大超商大賣場,一天賣走幾千罐,連大陸遊客都湊熱鬧買返去做手信。你上網查下就知所謂天然發酵是把固體狀的黃豆放在古甕中漚半年才有半缸豉油出嚟,如未經調味更是澀到爆,咁佢點可以短時間量產咁Q多呢?最後俾人踢爆,所謂信譽最好的豆油伯屏科大等,根本沒有量產配套,都係去原本信譽最好的醬油廠買原汁回來加工處理,咁樣叫做天然? 叫做新鮮? 

簡明醬油製法比較。網絡照片

台灣跟隨日本生產規格和嚴謹的標簽法,優質廠如金蘭或萬家香之類,都會在瓶身上標明例如:「100%純天然釀造,絕不使用化學醬油,不添加防腐劑、 焦糖色素、味精」去年還玩多一句:「採用非基因改造黃豆」,當然,更經過最嚴謹的殺菌過程處理。 

而老實講,任何食物不含防腐劑想以任何包裝形式保全一年以上,裡面一定有D合法不叫做防腐劑的防腐劑,例如砂糖、酒精、鹽之類,咁其實又有幾天然健康呢?

好似豉油呢D量產嘢,愈大路愈安全,因為佢地做大生意,輸唔起, 乜嘢都盡量做到最高規格,各位精明靚師奶,買之前,睇清楚條標簽至出手啦!(第六集)


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe