明天阿鄭終於要見家翁啦！而阿㐂，食完芝士火煱就早d瞓，瑞士時間凌晨三四點還要爬起身睇「眾新聞」直播司長上火煱。
香港股民據說有一球，百萬雄師再創新高。明天手機上按一下騰訊，再按一下就看騰雞的司長，資訊科技咁厲害，騰訊一定仲有排升，五百蚊樓下揸住勿沽，很快有大行話睇㐂。
至於今早司長的地庫相曝光，人人估相從那裡來。地產高層老友一看就説是當年有人睇樓映落，今日有用就流出。
明早一開會一定又話司長上來並不是要聚焦僭建，要講下其他嘢，大玩閃避球就預咗㗎啦！不過這次可不是咁容易甩身的。
因為最討厭是阿㐂講的「包容」，太忙要包容，話阿鄭新女下海，都近六十歲人仲因為未歷官塲冇經驗要包容？二十七歲本土靚女蕙禎才真正是新女下海，又唔見你包容？又唔見你幫口話蕙禎只是因為個口生「飛滋」，而把china讀成支那？要靚女嘔糧破產真係要佢下海才收貨。阿炎阿聰又夠新佬新仔下海啦，而家仲要被人玩second DQ，阿聰仲要電子通櫃。你玩要到咁寸咁絕，一有位入，人家一定百倍奉還。
小鮮肉時的徐志摩扮憂鬱，寫新詩溝死女——「輕輕的我走了，正如我輕輕的來」，這一句對司長明天可能啱用，「我揮一揮衣袖，不帶走一片雲彩」，呢句就唔啱啦，你這十幾天出了不少公帑人工，你這十多天除了自己做仲裁和裝修佬開會，還做了什麽？請你嘔出十多天糧，供執印花的婆婆及長毛買麵包。
