【撰文：陳義嵐】
「姓陳、黃、李、張嘅人下年會嫁個有錢人，tag 佢地出嚟啦！」、「唔飲水會死，同意請按讚」，為咗吸引更多人like，唔少Facebook專頁都會出埋呢啲無質素、無內容但吸like度極高的post，而近排Facebook終 於出手，懲罰呢類呃like呃comment嘅專頁，去提高動態時報上的內容質素。
Engagement rate（互動／參與率），即係一個post有幾多人睇到、有幾多人「參與互動」（如讚好、 分享、留言）。為咗增加專頁的能見度同engagement，唔少專頁都會利用engagement bait （參與誘餌），例如上文提到「同意就like」、「 tag兩個閨蜜抽獎」、以「心心、嬲嬲、哈哈」投票等，重點係以極低成本同極無內容嘅「內容」，去吸取最多嘅engagement同粉絲量，一方面可以滿足客戶、老細要求，另方面又可以谷大條數令更多客戶落疉。
不過，隨住呢類engagement bait開始泛濫，Facebook動態時報(News feed)上的內容品質亦都每況愈下。試諗下，你辛辛苦苦寫咗篇文、拍咗條片，所得嘅like數只係同一個「 同意請按讚」嘅post差唔多、甚至更少嘅時候，仲有邊個願意花時間出高質post？有見及此，Facebook終於出手——當發現有專頁用呢類engagement bait，就會降低佢嘅觸及率（reach)；而當專頁「 改邪歸正」，就可以贏翻之前冇咗嘅觸及率。
冇得用呢啲engagement bait，可能一眾digital marker會好頭痕——以後交數俾個客咪難好多？ 喺答呢個問題之前，不如大家一齊諗下真正engagement嘅意義係咩？
最表面嗰層上面講咗，係觸及率、讚好、分享、留言等數字。無錯，只要一個人like咗或喺留言tag咗一個朋友，唔理佢有冇睇過個post嘅內容，某程度上都已經係一個「互動」 。
好似之前顏福偉宣傳新歌時就以1 like捐10蚊，成功吸到超過六萬點擊率同3000幾個like，筆者當時都抱住食花生嘅心態俾咗個like，至於首歌？聽咗5秒囉。我有冇同顏福偉或佢首新歌有任何互動？呢個咁私人嘅問題都唔方便喺度多講喇。
而另一個都係10蚊、但互動程度大小小嘅例子就係「幸福多拿」，一個寫幸福故事換「錢」喺小店度用嘅campaign。我唔會話呢個campaign精彩絕倫，但至少佢唔係呃完like交到數就拍拍籮柚走，而係嘗試將觀眾由網絡帶返去現實，將佢地嘅一個個like同view轉化為人同人、人同小店嘅互動——做廣告campaign嘅朋友，唔應該都係想觀眾睇完有所啟發、繼而做啲有意義嘅事咖咩？
以前只要一條feed高質，自然可以吸到人去睇、去like、去留言，先令到Engagement成為一個post嘅表現指標。但唔知由幾時開始，人就開始麻木咁去追求數字，開始忘記engagement嘅本意，其實係製造同觀眾有意義嘅互動。就好似現實中人同人相處一樣，你同個hi bye friend say hi係一個互動，同你班兄弟飲酒吹水吹通頂都係互動，但邊樣先係有意義嘅溝通？邊樣可以等你增加對彼此嘅了解？
