眾新聞 Logo
眾新聞 CitizenNews
眾說

明明變種可以救地球,你係都要屈我係怪獸



【撰文:柳臣】
作者喜歡寫作,網媒小心輕看總編輯

大家第一次聽變種呢個名詞應該就係X-Men入面,我地叫狼人、X教授做變種人。

係戲入面,狼人同X教授雖然係正派,但係處處受到排斥打壓,甚至受政府嘅追殺。

點解會有「排斥」?因為大眾對變種人的天賦能力不了解,所以產生恐懼。

點解要「追殺」?因為政府未遇過變種人,無得抄前例,唔識處理又唔知搵邊個揹飛。

唯有將「未證明到會危害」扭曲做「未知的危害」,冠上「變種」兩個字。明明班「變種人」可以拯救地球,都當你怪獸追殺咗先!

戲如人生,呢類情況香港都經常發生。你睇番前幾日政府吸煙與健康委員會放出嚟個條宣傳片都見到。

就算國際間已經有好多研究證明電子煙同加熱煙呢類新式煙草產品,比舊式傳統煙低危害多多聲。政府一於話之你,佢講到電子煙同加熱煙嘅時候,用嘅係「變種煙」,而唔係「改良煙」。

明明所謂嘅「變種煙」可以幫到煙民,都被你當怪獸,真係十足十X-Men。

X-Men比柳臣嘅啟示係,「變種」根本係妖魔化異類嘅敍述,變種人嘅煉成正正係政府通過文字上嘅再現建構出嚟嘅敵人。

直接啲講,妖魔化咗你之後追殺你,令佢可以借此避免咗認真去討論變得好唔好呢個問題。

因為無論戲裡戲外,理性討論說服人都唔係政府擅長嘅手腕,直接DQ你,咪最方便簡單完事囉!

正如之前我係〈食煙同J盧覓雪一樣,唔好噴到我就得〉篇文都講過,鬼唔知食煙無益咩!但如果「變種」之後嘅加熱煙,係二手煙少啲,釋放嘅致癌物少咗,咁呢個「變種」就叫做「進化」啦!

有無「變種人」、「變種煙」根本係一個偽名題,「變種」之後好唔好?點樣令件事變得更好,先係值得探討嘅問題。


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe